ఆస్ట్రేలియాతో టెస్టు సిరీస్కు కెప్టెన్ కోహ్లీ, పరిమిత ఓవర్ల సిరీస్కు రోహిత్ శర్మ దూరమవ్వడం టీమ్ఇండియాకు పూడ్చలేని లోటని ఆసీస్ స్టార్ బ్యాట్స్మన్ స్టీవ్ స్మిత్ అభిప్రాయపడ్డాడు. అయితే క్లిష్ట పరిస్థితుల్లో ఉన్నప్పుడు ఆదుకునేందుకు ప్రత్యర్థి జట్టులో ప్రతిభావంతమైన ఆటగాళ్లు ఉన్నారని చెప్పాడు.
"చాలా ఏళ్ల నుంచి పరిమిత ఓవర్ల సిరీస్లో, టాప్ఆర్డర్లో రోహిత్ తానేంటో నిరూపించుకున్నాడు. కాబట్టి ఈసారి అతడు లేకపోవడం జట్టుకు లోటు. కానీ ఆ స్థానాన్ని భర్తీ చేసేందుకు టీమ్ఇండియాలో చాలా మంది ఆటగాళ్లు ఉన్నారు. ఐపీఎల్లో మయాంక్, కేఎల్ రాహుల్ టాప్ ఆర్డర్లో అద్భుతంగా ఆడారు. కాబట్టి హిట్మ్యాన్ లోటును తీర్చేందుకు చాలా మార్గాలు ఉన్నాయని భావిస్తున్నాను. కోహ్లీ గొప్ప ఆటగాడు. చాలాకాలం నుంచి అన్ని ఫార్మాట్లలో బాగా ఆకట్టుకుంటున్నాడు. టెస్టులకు అతడు దూరమవ్వడం జట్టుపై ప్రభావం చూపుతుంది"
-స్మిత్, ఆసీస్ క్రికెటర్
బాల్ ట్యాంపరింగ్ కారణంగా 2018-19 భారత్-ఆసీస్ బోర్డర్-గావస్కర్ సిరీస్కు స్మిత్ దూరమయ్యాడు. అయితే ఈసారి జరగబోయే సిరీస్లో మాత్రం తాను అదరగొట్టాలని అనుకుంటున్నట్లు స్మిత్ చెప్పాడు. ఇరుజట్ల మధ్య ఈ సిరీస్ హోరాహోరీగా సాగుతుందని అన్నాడు.
రోహిత్ అనుమానమే
ఐపీఎల్లో గాయపడ్డ రోహిత్.. ప్రస్తుతం బెంగళూరులోని ఎన్సీఏ శిక్షణ శిబిరంలో ఉన్నాడు. ఇక్కడ పూర్తి స్థాయిలో ఫిట్నెస్ సాధిస్తేనే ఆసీస్తో జరిగే టెస్టు సిరీస్కు అర్హత సాధిస్తాడు. అతడు ఆసీస్ పర్యటనకు వెళ్లనున్నాడా లేదా అనే విషయమై బీసీసీఐ ఇంకా ఎలాంటి ప్రకటన చేయలేదు. దీంతో రోహిత్ ఆడటంపై అనుమానాలు వ్యక్తమవుతున్నాయి.
అయితే ఈ మధ్యే ఓ ఇంటర్వ్యూలో మాట్లాడిన రోహిత్.. తాను టెస్టుల్లో ఆడి తీరుతానని ధీమా వ్యక్తం చేశాడు. నవంబరు 27న ప్రారంభమై జనవరి 19న ముగిసే ఈ సిరీస్లో.. ఇరు జట్లు మూడు వన్డేలు, మూడు టీ20లు, నాలుగు టెస్టుల్లో తలపడనున్నాయి.
ఇదీ చూడండి :
