భారత వికెట్ కీపర్ రిషభ్ పంత్కు 2019 ఏడాది పెద్దగా కలిసిరాలేదు. అనుభవజ్ఞుల మద్దతు ఉన్నప్పటికీ.. గతేడాది భారత ప్రపంచకప్ జట్టులో ప్రత్యామ్నాయ ఆటగాడిగా ఎంపికయ్యాడు. ఈ క్రమంలోనే ధోనీ జట్టుకు దూరమైన కారణంగా.. రిషభ్కు సత్తా నిరూపించుకునే సువర్ణవకాశం లభించింది. అయితే కీపర్గా ధోనీ స్థానంలో వచ్చిన పంత్.. 2020 ప్రారంభంలో తీవ్ర ఒత్తిడికి గురయ్యాడు. ఆ తర్వాత కేఎల్ రాహుల్ ఆ స్థానంలో మంచి గుర్తింపు తెచ్చుకోగా.. పంత్కు ప్రాధాన్యం తగ్గిపోయింది.
అయితే, పంత్కు ఇంకా మేనేజ్మెంట్ మద్దతు ఉందని టీమ్ఇండియా బ్యాటింగ్ కోచ్ విక్రమ్ రాథోడ్ తెలిపాడు. పరుగులు సాధించడంలో పంత్ జట్టుకు ఎంతగానో కృషి చేస్తాడని వెల్లడించాడు. ధోనీ స్థానంలోని ఒత్తిడిని అర్థం చేసుకున్న అతడు బలమైన, మంచి ఆటగాడిగా మారతాడని అభిప్రాయపడ్డాడు. ఇటీవలే ఓ మీడియాకు ఇచ్చిన ఇంటర్వ్యూలో మాట్లాడిన రాథోడ్ .. తన అభిప్రాయాలు పంచుకున్నాడు.
"పంత్ గతేడాది అంత గొప్ప ప్రదర్శన చేయలేదు. అతడికి ఇప్పటికీ టీమ్ మేనేజ్మెంట్ మద్దతు ఉంది. పంత్ ఓ ప్రత్యేకమైన ఆటగాడని నమ్ముతున్నాం. ఒక్కసారి అతడు పరుగులు చేయడం మొదలుపెడితే.. జట్టుకోసం ఎంతో కృషి చేస్తాడు. ధోనీ స్థానాన్ని భర్తీ చేయడం అంత సులభం కాదు. పంత్ కొన్ని వైఫల్యాలను ఎదుర్కొన్నాడు. కాబట్టి కొంత ఒత్తిడికి లోనవుతున్నాడు. అయితే, ఇలాంటివన్నీ తనని బలమైన, మంచి ఆటగాడిగా మారుస్తాయి."
-విక్రమ్ రాథోడ్, టీమ్ఇండియా బ్యాటింగ్ కోచ్
గతేడాది బంగ్లాదేశ్ సిరీస్లో పంత్కు రెండు అవకాశాలు లభించాయి. ఆస్ట్రేలియాతో జరిగిన వన్డే సిరీస్లో పంత్కు గాయం కావడం వల్ల.. రాహుల్ ఆ స్థానంలోకి వచ్చాడు. ఓ వైపు బ్యాట్స్మన్గా రాణిస్తూనే.. వికెట్ కీపర్గా మంచి గుర్తింపు తెచ్చుకున్నాడు. అలా కెప్టెన్తో పాటు మేనేజ్మెంట్ నమ్మకాన్ని గెలుచుకున్న రాహుల్.. పంత్ను ప్రత్యామ్నాయ ఆటగాడిగా మార్చేశాడు.
