బాక్సింగ్ డే టెస్టులో ఆస్ట్రేలియాపై ఘనవిజయం సాధించింది టీమ్ఇండియా. ఈ మ్యాచ్లో జట్టుకు కెప్టెన్సీ చేసిన అజింక్యా రహానెపై ఆసీస్ మాజీ కెప్టెన్ ఇయాన్ చాపెల్ ప్రశంసల వర్షం కురిపించారు. రహానె.. సాహసవంతుడని, తెలివైనవాడని, జట్టుకు నాయకత్వం వహించడానికే పుట్టాడని కొనియాడారు.
"మెల్బోర్న్ టెస్టులో కెప్టెన్గా టీమ్ఇండియాను రహానె అద్భుతంగా నడిపించాడు. 2017లో ఆసీస్తో ధర్మశాలలో జరిగిన టెస్టు మ్యాచ్ చూసిన ఎవరైనా.. రహానె నాయకత్వం వహించడానికే పుట్టాడని అర్థం చేసుకుంటారు. అప్పటి మ్యాచ్కు, మెల్బోర్న్ టెస్టుకు పోలికలున్నాయి. అప్పుడు కూడా చేయాల్సింది తక్కువ పరుగులే అయినా లోయర్ ఆర్డర్లో రవీంద్ర జడేజా నుంచి అద్భుత సహకారంతో రహానె మ్యాచ్ను పూర్తిచేశాడు. నాడు వార్నర్-స్మిత్లు సెంచరీ భాగస్వామ్యంలో ఉండగా అరంగేట్రంలో ఉన్న కుల్దీప్ యాదవ్కు బంతి ఇచ్చాడు రహానె. ఆ సంచలన నిర్ణయం సత్ఫలితాలనిచ్చింది. అతడు కేవలం ధైర్యవంతుడు, తెలివైనవాడే కాదు.. పరిస్థితులు చేయిదాటిపోయేలా ఉన్నా ప్రశాంతంగా ఉండగలడు. అవసరమైన సమయంలో పరుగులు చేసి సహచరుల నుంచి అమితమైన గౌరవం సంపాందించాడు రహానె. మంచి సారథి లక్షణం అదే."
-ఇయాన్ చాపెల్, ఆస్ట్రేలియా మాజీ కెప్టెన్
అడిలైడ్ టెస్టులో 36పరుగులతో కెరీర్లోనే చెత్త రికార్డు నమోదు చేసింది టీమ్ఇండియా. మెల్బోర్న్లో రెండో మ్యాచ్లో సారథి విరాట్ కోహ్లీ, రోహిత్, పేసర్లు షమీ, ఇషాంత్ శర్మ వంటి స్టార్ ఆటగాళ్లు లేకున్నా.. అద్భుతమైన వ్యూహాలతో జట్టును విజయతీరాలకు చేర్చాడు రహానె.
జస్ప్రీత్ బుమ్రా, రవిచంద్రన్ అశ్విన్లను కూడా చాపెల్ ప్రశంసించారు. ఎప్పటిలాగే బుమ్రా తన టెక్నిక్తో బ్యాట్స్మెన్ను బోల్తాకొట్టించాడని తెలిపారు. అశ్విన్ మరోసారి స్మిత్పై తన ఆధిపత్యాన్ని చాటుకున్నాడని చాపెల్ అన్నారు. సీనియర్ల స్ఫూర్తితో అరంగేట్రంలోనే శుభమన్ గిల్, మహ్మద్ సిరాజ్ అదరగొట్టారని చెప్పారు.
ఇదీ చూడండి: మెల్బోర్న్లో వర్షం.. ఆగిన టీమ్ఇండియా ప్రాక్టీస్
