'ఫిట్ ఇండియా' ఉద్యమం తొలి వార్షికోత్సవం సందర్భంగా ఫిట్నెస్ ఔత్సాహికులు, క్రీడాకారులతో వర్చువల్గా సంభాషించారు ప్రధానమంత్రి నరేంద్ర మోదీ. ఈ సందర్భంగా 'వయసుకు తగిన ఫిట్నెస్ ప్రోటోకాల్స్'ను ప్రారంభించారు. ఫిట్నెస్ ఔత్సాహికుల సూచనల మేరకు మూడు కేటగిరీలుగా ఈ ప్రోటోకాల్స్ను రూపొందించారు. అందులో 5-18, 18-65, 65 సంవత్సరాలు ఆపై వయసు కేటగిరీలుగా విభజించారు.
వర్చువల్ సమావేశంలో భాగంగా.. ఫిట్నెస్, పోషణ, సవాళ్లు, ఆరోగ్యంగా ఉండేందుకు తీసుకోవాల్సిన చర్యలు వంటి విషయాలను అడిగి తెలుసుకున్నారు మోదీ. ఈ సందర్భంగా ఫిట్నెస్ విషయంలో తమ అనుభవాలను పంచుకున్నారు పలువురు సభ్యులు. ఆరోగ్యంగా ఉండవలసిన అవసరం, దినచర్యలో విభిన్న విధానాలు, స్వల్ప మార్పులతో జీవితాన్ని ఆరోగ్యంగా మార్చుకునేందుకు వీలుకలుగుతుందని వివరించారు.
" ఆరోగ్యకరమైన మనసుకు ఆరోగ్యకరమైన శరీరం అవసరం. అందుకు శరీర దారుఢ్యమే ప్రధానం. రెండు భోజనాల మధ్య అంతరం ఉండాలి. తద్వారా మనం తినేదాన్ని ప్రాసెస్ చేయడానికి శరీరం సిద్ధంగా ఉంటుంది. ఫిట్నెస్ ప్రయత్నాల్లో ఉత్తమ ఫలితాలు పొందేందుకు తమ ప్రాధాన్యతను నిర్ణయించటం చాలా ముఖ్యమైన విషయం. "
- విరాట్ కోహ్లీ, భారత క్రికెట్ జట్టు సారథి
ఈ కార్యక్రమంలో కేంద్ర క్రీడల మంత్రి కిరణ్ రిజిజు, భారత క్రికెట్ జట్టు సారథి విరాట్ కోహ్లీ, పారాఒలంపిక్స్ బంగారు పతక విజేత, జావలిన్ త్రో క్రీడాకారుడు దేవేంద్ర జాజారియా, మహిళా ఫుట్బాల్ క్రీడాకారిణి అఫ్షానా ఆశిక్, ఫిట్నెస్ ప్రమోటర్ మిలింద్ సోమన్, వ్యాయామ శాస్త్ర నిపుణుడు రుజుతా దివేకర్, యోగా గురువు స్వామి శివదయానంద్ సరస్వతి, జాతీయ ఆర్గనైజింగ్ కార్యదర్శి ముకుల్ కనిత్కర్ పాల్కొన్నారు.
దేశ పౌరులంతా సంపూర్ణ ఆరోగ్యంతో ఉండాలనే ధ్యేయంతో జాతీయ క్రీడా దినోత్సవం సందర్భంగా ఫిట్ ఇండియా ఉద్యమాన్ని 2019, ఆగస్టు 29న ప్రారంభించారు ప్రధాని మోదీ. దిల్లీలోని ఇందిరాగాంధీ ఇండోర్ మైదానంలో ఈ కార్యక్రమం నిర్వహించారు. ఇందులో భాగంగా నిర్వహించిన వివిధ కార్యక్రమాల్లో 3.5 కోట్ల మందికిపైగా పాల్గొన్నారు. అంతకు ముందు ఆగస్టు 15న నిర్వహించిన ఫిట్ ఇండియా ఫ్రీడమ్ రన్లో 2.5 కోట్ల మంది పాలుపంచుకున్నారు.
ఇదీ చూడండి: ఫిట్ ఇండియా: కోహ్లితో ప్రధాని మోదీ భేటీ
