న్యూజిలాండ్లో విజయాల మోత మోగిస్తోన్న భారత జట్టు.. నేడు బే ఓవల్ మైదానంలో కివీస్తో ఆఖరి టీ20 ఆడనుంది. ఇప్పటికే ఐదు మ్యాచ్ల సిరీస్లో 4-0 ఆధిక్యంలో ఉన్న కోహ్లీసేన... క్లీన్స్వీప్ కోసం ప్రయత్నిస్తోంది. మరోవైపు న్యూజిలాండ్ జట్టు పరువు కాపాడుకునేందుకు తపిస్తోంది.
ర్యాంక్ లక్ష్యమైతే...
న్యూజిలాండ్ గడ్డపై భారత్ ఇప్పటివరకు టీ20 సిరీస్ గెలవలేదు. 2009లో ధోనీ సారథ్యంలోని జట్టు 0-2తో ఓటమి పాలైంది. గతేడాది మూడు మ్యాచ్ల సిరీస్ 1-2తో చేజారింది. అయితే తాజా సిరీస్లో నాలుగు విజయాలు సాధించిన కోహ్లీ సేన.. ఇప్పటికే కివీస్ గడ్డపై ట్రోఫీ ఖాయం చేసుకుంది. అయితే ఐదు మ్యాచ్లు గెలిస్తే.. 'మెన్ ఇన్ బ్లూ' టీ20 ర్యాంకింగ్స్లో మరింత ముందుకెళ్తుంది. ఎప్పటినుంచో ఐదో స్థానానికే పరిమితమైన భారత్.. మెరుగైన ప్రదర్శన చేస్తే ఒక ర్యాంకు మెరుగుపడి నాలుగోస్థానానికి ఎగబాకొచ్చు.
పంత్కు అవకాశం...
ప్రస్తుతం టీమిండియా బ్యాటింగ్ లైనప్ బలంగా ఉంది. నాలుగు మ్యాచ్లు గెలిచి ఊపుమీదున్న భారత జట్టు.. ఈ మ్యాచ్లో భారీ మార్పులకు సిద్ధమౌతున్నట్లు తెలుస్తోంది. గత మ్యాచ్లో ఓపెనర్గా బరిలోకి దిగిన సంజు శాంసన్ ఈ మ్యాచ్లో రోహిత్తో కలిసి బరిలోకి దిగే అవకాశముంది. కేఎల్ రాహుల్ స్థానంలో పంత్ రానున్నాడు. వాషింగ్టన్ సుందర్, జడేజా, శార్దూల్, మనీశ్ పాండే తుది జట్టులో పక్కాగా ఉండనున్నారు. చాహల్ స్థానంలో కుల్దీప్, బుమ్రా బదులు షమీ జట్టులోకి రానున్నారు.
కివీస్ ఆత్మవిశ్వాసానికి దెబ్బ...
టీ20 ప్రపంచకప్ ముంగిట వరుస ఓటములు న్యూజిలాండ్కు అవమానంగా మారాయి. బౌలింగ్‌ పరంగా ఆ జట్టులో ఇబ్బందులేమీ లేవు. పేసర్లు, స్పిన్నర్లు చక్కగా బంతులు విసురుతున్నారు. కానీ భారత్ బ్యాట్స్‌మెన్‌ వారిని సమర్థంగా ఎదుర్కొంటున్నారు. గత మ్యాచ్లో ఆడని కేన్ విలియమ్సన్ మళ్లీ జట్టులోకి రానున్నాడు. బ్యాట్స్‌మన్‌ టామ్‌ బ్రూస్‌ ఈ మ్యాచ్లోనూ బరిలోకి దిగే అవకాశముంది.
భారత్ జట్టు (అంచనా)...
విరాట్ కోహ్లీ (కెప్టెన్), రోహిత్శర్మ (వైస్ కెప్టెన్), సంజు శాంసన్, కేఎల్ రాహుల్/రిషభ్ పంత్ (కీపర్), వాషింగ్టన్ సుందర్, రవీంద్ర జడేజా, కుల్దీప్/చాహల్,జస్ప్రీత్ బుమ్రా/మహ్మద్ షమి, నవదీప్ సైని, శార్దూల్ ఠాకూర్
న్యూజిలాండ్ జట్టు (అంచనా)...
కేన్ విలియమ్సన్ (కెప్టెన్), టామ్‌ బ్రూస్‌, మార్టిన్ గప్తిల్, కొలిన్ మన్రో, రాస్ టేలర్, మిచెల్ సాంట్నర్, టిమ్ సీఫెట్, ఇష్ సోదీ, టిమ్ సౌతీ, స్కాట్ కగ్గిలిన్, డారెల్ మిచెల్/ బ్లెయర్ టిక్నర్/హమీష్ బెన్నెట్
