ప్రపంచంలోనే అత్యుత్తమ బౌలర్లలో ఒకడిగా గుర్తింపు పొందిన పాకిస్థాన్ మాజీ పేసర్ షోయబ్ అక్తర్. అయితే, ఒకానొక సమయంలో భారత మాజీ కెప్టెన్ ఎంఎస్ ధోనీకి ఉద్దేశపూర్వకంగా నేరుగా తలపైకి బంతిని (బీమర్) విసిరినట్లు తెలిపాడు. భారత్, పాక్ జట్ల మధ్య 2006 ఫైసలాబాద్ టెస్టు మ్యాచ్ సందర్భంగా ఈ సంఘటన జరిగిందని అక్తర్ గుర్తుచేసుకున్నాడు.
ఇటీవలే ఓ మీడియాకు ఇచ్చిన ఇంటర్వ్యూలో మాట్లాడుతూ.. ధోనీ తన బౌలింగ్లో అద్భుత ప్రదర్శన కనబరచడం వల్ల ఒత్తిడితో ఉద్దేశపూర్వకంగానే బీమర్ వేసినట్లు వెల్లడించాడు.
"1997లో నా మోకాలు పూర్తిగా దెబ్బతిని.. పనికిరానివిగా మారాయి. కానీ అవేమీ పట్టించుకోకుండా ఆడాలని నిర్ణయించుకున్నా. అందుకోసం ఇంజక్షన్ల సాయం తీసుకున్నా. టీమ్ఇండియా పాకిస్థాన్లో పర్యటించిన సమయానికి నా కాలు ఫైబులా ఎముక విరిగింది. ఫైసలాబాద్లో జరిగిన మ్యాచ్లో ధోనీ అద్భుతంగా రాణించాడు. అప్పటికే మ్యాచ్ ఆడేందుకు ఇంజక్షన్లు ఉపయోగించా. ఇదే నా చివరి టెస్టు మ్యాచ్ అని నిర్ణయించుకున్నా. అప్పుడే ఉద్దేశపూర్వకంగా తలపైకి బంతిని విసిరా."
-షోయబ్ అక్తర్, పాక్ మాజీ బౌలర్
ఆ తర్వాత ధోనీకి క్షమాపణలు చెప్పినట్లు అక్తర్ వెల్లడించాడు. "నా జీవితంలోనే మొదటి సారి నేను కావాలనే బీమర్ వేశా. అందుకు చాలా బాధగా ఉంది. కానీ నేను వేసే ప్రతి బంతినీ ధోనీ వదలడం లేదు. బహుశా నేను విసుగు చెందా అనుకుంటున్నా" అని పేర్కొన్నాడు.
ఈ మ్యాచ్లో ధోనీ 153 బంతుల్లో 19 ఫోర్లు, 4 సిక్సర్లతో 148 పరుగులు సాధించాడు. ఆ మ్యాచ్ డ్రాగా ముగిసింది. అయితే, చివరి మ్యాచ్లో పాక్ గెలిచి 1-0తో తేడాతో ట్రోఫీ కైవసం చేసుకుంది.
