మహిళల ఐపీఎల్ను ప్రారంభించేందుకు బీసీసీఐ ఎక్కువకాలం ఎదురుచూడొద్దని టీమిండియా మహిళ వన్డే జట్టు సారథి మిథాలీ రాజ్ అభిప్రాయపడింది. పురుషులంత కాకపోయినా పరిమిత స్థాయిలోనైనా వచ్చే ఏడాది మహిళల ఐపీఎల్ మొదలుపెట్టాలని కోరింది. ఇటీవలే ఓ సందర్భంలో మాట్లాడిన మిథాలీ పలు విషయాలు చెప్పింది.
'పరిమిత స్థాయిలోనైనా వచ్చే ఏడాది మహిళల ఐపీఎల్ ఆడించాలి. పురుషుల ఐపీఎల్‌తో పోలిస్తే కొన్ని నిబంధనల్లో మినహాయింపులు ఇవ్వాలి. నలుగురు విదేశీ క్రికెటర్లే కాకుండా తొలి సీజన్‌లో ఐదు లేదా ఆరుగురితో ఆడించాలి' -మిథాలీ రాజ్, భారత మహిళా క్రికెటర్
పూర్తిస్థాయి ఐపీఎల్ ఆడేందుకు భారత్‌లో ఎక్కువ మంది మహిళా క్రికెటర్లు లేకపోయినా, ప్రస్తుత ఫ్రాంఛైజీలు జట్లను తీసుకుంటే ఆ సమస్యను అధిగమించొచ్చని మిథాలీ అభిప్రాయపడింది.
'దేశవాళీ క్రికెట్‌లో ఎక్కువ మంది మహిళా క్రికెటర్లు లేరనే విషయం నాకూ తెలుసు. అయితే, ఇప్పుడున్న ఫ్రాంఛైజీలు ఐదు లేదా ఆరు కొత్త జట్లను తయారు చేస్తే సరిపోతుంది. ఎలాగూ బీసీసీఐ దగ్గర నాలుగు జట్లున్నాయి. ఈ విషయంపై ఎక్కువకాలం వేచిచూడొద్దు. ఏదో ఓ సందర్భంలో ముందడుగు వేయాలి. ఏటా కొనసాగిస్తూ మెల్లమెల్లిగా నలుగురు విదేశీయుల సూత్రాన్ని అవలంబించాలి' అని వివరించింది.
అలాగే టీ20 ప్రపంచకప్‌లో సత్తా చాటిన యువ సంచలన బ్యాటర్‌ షెఫాలీవర్మను వన్డేల్లోనూ కొనసాగించాలని మిథాలీ పేర్కొంది. ప్రతిభకు వయసు అడ్డంకి రాకూడదని చెప్పింది.
