ఈ ఏడాది ఐపీఎల్లో చెన్నై అభిమానులకు ఉత్సాహాన్నిచ్చే వార్త ఇది. చెపాక్ స్టేడియంలో గత కొంత కాలంగా మూసివేసిన మూడు స్టాండ్స్ను తిరిగి వాడుకలోకి తీసుకురానున్నారు. తాజాగా ఈ విషయంపై చెన్నై మున్సిపల్ కార్పొరేషన్ సూచించిన విధంగా స్టాండ్స్‌లో మార్పులు చేసేందుకు తమిళనాడు క్రికెట్ అసోసియేషన్ అంగీకరించింది.
ఇంతకీ ఏం జరిగింది?
2012లో చెపాక్ స్టేడియంలో అధునాతనంగా మూడు స్టాండ్స్ నిర్మించారు. వీటికి అనుమతిచ్చేందుకు చెన్నై మున్సిపల్ కార్పొరేషన్ నిరాకరించింది. అప్పటి నుంచి 12 వేల సామర్థ్యమున్న ఆ స్టాండ్స్ను మూసేశారు. అంతర్జాతీయ మ్యాచ్లు జరిగినప్పుడూ వాటిని తెరవలేదు. రానున్న ఐపీఎల్ సీజన్ కోసం వాటిని పునః ప్రారంభించనున్నారు.
ఫిబ్రవరిలో ఈ స్టాండ్స్కు సంబంధించిన పనులు మొదలవుతాయని చెప్పిన తమిళనాడు క్రికెట్ అసోసియేషన్.. ఐపీఎల్ ప్రారంభమయ్యే సరికి వీటిని సిద్ధం చేస్తామని చెప్పింది. ఇకపై చెన్నై సూపర్ కింగ్స్.. సొంత మైదానంలో ఆడే మ్యాచ్లు మరింత సందడిగా సాగనున్నాయి.
