టీ20 ఫార్మాట్లో కెప్టెన్సీ కత్తిమీద సాములాంటిది. క్షణాల్లో ఫలితం మారిపోయే ఈ పొట్టి ఫార్మాట్లో తీసుకునే నిర్ణయాల్లో తడబాటు కనిపించకూడదు. ఐపీఎల్ సారథులకు ఒత్తిడి సమయంలోనూ మెదడుకు పనిచెప్పే నేర్పరితనం ఉండాలి. అందుకే ఎవరైతే ప్రశాంతంగా ఉండి, సరైన సమయంలో సరైన నిర్ణయం తీసుకుంటారో వారి జట్టుకు విజయావకాశాలు ఎక్కువగా ఉంటాయి. లీగ్లో ఇప్పటివరకు కొందరు మాత్రమే కెప్టెన్సీలో విజయవంతమయ్యారు. కొందరు తక్కువ కాలానికే ఆ పదవి నుంచి తప్పుకొన్నారు. మరికొద్ది రోజుల్లో ఐపీఎల్ 14వ సీజన్ ప్రారంభమవుతోన్న నేపథ్యంలో ఈ లీగ్లో అత్యంత విజయవంతమైన కెప్టెన్లు (కనీసం 10 మ్యాచ్లకు సారథిగా చేసినవారు) ఎవరో చూద్దాం.
రోహిత్ శర్మ (60.34)
ముంబయి ఇండియన్స్కు 8 ఏళ్లుగా కెప్టెన్గా ఉన్న రోహిత్ శర్మ.. జట్టును 5 సార్లు విజేతగా నిలిపాడు. ప్రతి సీజన్లోనూ తన కెప్టెన్సీతో ఆకట్టుకునే ఇతడిని ఐపీఎల్లో అత్యుత్తమ కెప్టెన్ అనడంలో సందేహం లేదు. జట్టుకు సారథిగా చేసిన మ్యాచ్ల్లో 60 శాతం విజయాలతో దూసుకెళ్తున్నాడు హిట్మ్యాన్. మొత్తంగా ఇప్పటివరకు 116 మ్యాచ్లకు సారథ్యం వహించిన రోహిత్ 70 మ్యాచ్ల్లో విజయాన్నందించాడు. ఇతడి సారథ్యంలో 2013, 2015, 2017, 2019, 2020 సీజన్లలో విజేతగా నిలిచింది ముంబయి.
స్టీవ్ స్మిత్ (59.52)
టీ20 లీగ్లతో పాటు అంతర్జాతీయ క్రికెట్లోనూ కెప్టెన్గా తన సత్తా నిరూపించుకున్నాడు ఆస్ట్రేలియా క్రికెటర్ స్టీవ్ స్మిత్. 2017లో పుణె వారియర్స్కు ఆడిన సమయంలో ధోనీ నుంచి పగ్గాలు అందుకున్న ఇతడు జట్టును అద్భుతంగా నడిపించాడు. అలాగే రాజస్థాన్ రాయల్స్కూ పలు సీజన్లలో కెప్టెన్గా చేశాడు. మొత్తంగా ఐపీఎల్లో 42 మ్యాచ్లకు సారథ్యం వహించిన స్మిత్ 25 మ్యాచ్ల్లో జట్టుకు విజయాన్ని చేకూర్చాడు. ఇతడి విజయ శాతం 59.52గా ఉంది.
సచిన్ తెందూల్కర్ (58.82)
టీమ్ఇండియాకు కెప్టెన్గా అంతగా విజయం సాధించని సచిన్ తెందూల్కర్ ఐపీఎల్లో మాత్రం తన కెప్టెన్సీతో ఆకట్టుకున్నాడు. ఇతడి సారథ్యంలో 2010లో ముంబయి ఇండియన్స్ పైనల్స్కు చేరుకుంది. కానీ తుదిపోరులో చెన్నై సూపర్ కింగ్స్ చేతిలో ఓడి రన్నరప్గా నిలిచింది. మొత్తంగా ఐపీఎల్లో 51 మ్యాచ్లకు సారథ్యం వహించిన సచిన్.. 30 మ్యాచ్ల్లో విజయవంతమయ్యాడు. విజయ శాతం 58.82గా ఉంది.
ధోనీ (58.82)
ఐపీఎల్ చరిత్రలో 2008 నుంచి ఇప్పటివరకు ఓ జట్టుకు కెప్టెన్గా కొనసాగుతున్న ఒకే ఒక్కడు ధోనీ. చెన్నై సూపర్ కింగ్స్ను మొదటి సీజన్ నుంచి సారథ్యం వహిస్తోన్న మహీ ఇప్పటివరకు జట్టుకు 3 ట్రోఫీలు అందించాడు. ఇతడి సారథ్యంలో చెన్నై 2010, 2011, 2018 సీజన్లలో విజేతగా నిలిచింది. మొత్తంగా ఐపీఎల్లో 188 మ్యాచ్లకు కెప్టెన్గా వ్యవహరించిన ధోనీ 110 మ్యాచ్ల్లో జట్టుకు విజయాలనందించాడు. విజయ శాతం 58.11గా ఉంది. 2016, 2020 మినహాయిస్తే ప్రతి సీజన్లోనూ చెన్నైని ప్లే ఆఫ్స్కు చేర్చాడు. అలాగే లీగ్లో ఎక్కువ మ్యాచ్లకు కెప్టెన్గా వ్యవహరించిన కెప్టెన్గానూ ధోనీ రికార్డు సృష్టించాడు.
కామెరూన్ వైట్ (58.33)
ఆస్ట్రేలియా మాజీ క్రికెటర్ కామెరూన్ వైట్ ఐపీఎల్లో ఆర్సీబీ, దక్కన్ ఛార్జర్స్, సన్రైజర్స్ హైదరాబాద్కు కెప్టెన్గా వ్యవహరించాడు. 2012 సీజన్ మధ్యలో సంగక్కర నుంచి దక్కన్ ఛార్జర్స్ సారథ్య బాధ్యతలు తీసుకున్నాడు వైట్. ఆ తర్వాత ఏడాది సన్రైజర్స్కూ కెప్టెన్గా చేశాడు. మొత్తంగా 12 మ్యాచ్లకు సారథ్యం వహించిన వైట్.. 7 మ్యాచ్ల్లో విజయవంతమయ్యాడు. విజయ శాతం 58.33గా ఉంది.
