ఐపీఎల్ నిర్వాహకులు మరో సరికొత్త మ్యాచ్కు రంగం సిద్ధం చేస్తున్నారు. ఇందులో టీమిండియా స్టార్ ప్లేయర్లు ధోనీ, కోహ్లీ, రోహిత్ ఒకే జట్టులో కనువిందు చేయనున్నారు. ఈ ఆల్ స్టార్ మ్యాచ్ తొలి సీజన్ ఈ ఏడాది నుంచే ప్రారంభమవుతుందని తెలుస్తోంది. తొలుత ఈ మ్యాచ్ను లీగ్ ఆరంభంలో నిర్వహించాలని అనుకున్నారు. అయితే ఫ్రాంచైజీలతో చర్చించాక టోర్నీ ముగింపు కార్యక్రమంగా మార్చారు. ఇటీవల కాలంలో ఈ మ్యాచ్ను కచ్చితంగా రద్దు చేస్తారని వార్తలు వచ్చాయి. వాటన్నింటికి తెరదించుతూ తాజా కబురు వినిపించారు లీగ్ నిర్వాహకులు. ఏయే ఆటగాళ్లు రాణిస్తారో చూసి సీజన్ చివర్లో ఆల్స్టార్స్ మ్యాచ్ నిర్వహిస్తామని ఐపీఎల్ పాలక మండలి ఛైర్మన్‌ బ్రిజేష్‌ పటేల్‌ స్పష్టం చేశారు.
" ఆల్స్టార్స్ మ్యాచ్ను మేం రద్దు చేయడం లేదు. టోర్నీ చివరకు వాయిదా వేస్తున్నాం. ఆటగాళ్లు ఎలాంటి ప్రదర్శన చేస్తారో మేం చూడాలనుకుంటున్నాం. ఫామ్‌ ఆధారంగా జట్లను ఎంపిక చేస్తాం" అని బ్రిజేస్‌ పటేల్‌ తెలిపారు.
నాలుగేసి జట్లుగా...
ప్రస్తుతం ఐపీఎల్లో ఎనిమిది జట్లు ఉన్నాయి. వాటిలో ఉత్తర, తూర్పు రాష్ట్రాలు ఒకవైపు, దక్షిణ, పడమర రాష్ట్రాల జట్లు మరో వైపు కలిసి ఆడనున్నాయి. ఫలితంగా కింగ్స్ ఎలెవన్ పంజాబ్, దిల్లీ క్యాపిటల్స్, రాజస్థాన్ రాయల్స్, కోల్కతా నైట్రైడర్స్ ఒక బృందంగా ఏర్పడనున్నాయి. చెన్నై సూపర్కింగ్స్, రాయల్ ఛాలెంజర్స్ బెంగళూరు, సన్రైజర్స్ హైదరాబాద్, ముంబయి ఇండియన్స్ ప్రత్యర్థి జట్టుగా ఉండనున్నాయి. ఇదే జరిగితే కోహ్లీ, ధోనీ, రోహిత్ ఒకే జట్టులో టీమిండియా జెర్సీ లేకుండా ఆడనున్నారు. ఇంకా తేదీలు, వేదిక ఖరారు కావాల్సి ఉంది.
ఐపీఎల్-2020 ఆరంభ మ్యాచ్ వచ్చే నెల 29న వాంఖడే వేదికగా జరగనుంది. తొలి మ్యాచ్లో డిఫెండింగ్‌ ఛాంపియన్ ముంబయి ఇండియన్స్, చెన్నై సూపర్ కింగ్స్ అమీతుమీ తేల్చుకోనున్నాయి. లీగ్ దశ 50 రోజులుపాటు జరిగి మే 17న ముగుస్తుంది. ఆ తర్వాత నాకౌట్‌ మ్యాచ్‌లు, మే 24న ఫైనల్‌ జరగనుంది.
