వచ్చే ఏడాది ఐపీఎల్, భారత్లోనే జరగనుందని బీసీసీఐ వెల్లడించింది. ఈ క్రమంలోనే టీమ్ఇండియా భవిష్యత్ ప్రణాళికలపై బోర్డు అధ్యక్షుడు సౌరభ్ గంగూలీ స్పందించారు. ఆస్ట్రేలియా పర్యటన తర్వాత వచ్చే సంవత్సరం ఇంగ్లాండ్కు ఆతిథ్యం ఇవ్వనున్నట్లు రాష్ట్ర క్రికెట్ సంఘాలకు రాసిన లేఖలో దాదా తెలియజేశాడు. దీని తర్వాత ఏప్రిల్లో ఐపీఎల్ను నిర్వహించనున్నట్లు స్పష్టం చేశాడు. వీటితో పాటే టీ20 ప్రపంచకప్(2021), వన్డే ప్రపంచకప్లకూ(2023) భారత్ ఆతిథ్యమివ్వనుందని తెలిపాడు.
"సెప్టెంబరు 19 నుంచి నవంబరు 10 వరకు యూఏఈలో ఐపీఎల్-2020 జరగనుంది. లీగ్ సజావుగా సాగేందుకు అవసరమైన ముందు జాగ్రత్త చర్యలు తీసుకున్నాం. పరిస్థితులన్నీ చక్కబడిన తర్వాత దేశవాళీ క్రికెట్ను తిరిగి ప్రారంభిస్తాం. ఆటగాళ్ల ఆరోగ్యాన్ని దృష్టిలో ఉంచుకునే బోర్డు నిర్ణయం తీసుకుంటుంది. త్వరలోనే కరోనా తగ్గుముఖం పడుతుందని ఆశిస్తున్నా"
సౌరభ్ గంగూలీ, బీసీసీఐ అధ్యక్షుడు
దేశంలో కరోనా వ్యాప్తి పెరుగుతున్న కారణంగా ప్రస్తుత ఐపీఎల్ సీజన్ను యూఏఈలో జరపాల్సి వచ్చింది. మరోవైపు భారత మహిళా సీనియర్ జట్టు పర్యటనలపైనా చర్చలు జరుపుతున్నట్లు గంగూలీ వివరించాడు. త్వరలోనే అన్నింటి గురించి వెల్లడిస్తామని పేర్కొన్నాడు.
