కరోనా మహమ్మారి కారణంగా ఇంగ్లాండ్ పర్యటనను రద్దు చేసుకునే ఆలోచనలో ఉంది భారత మహిళా క్రికెట్ జట్టు. జూన్లోనే ఇంగ్లీష్ గడ్డపై పర్యటనకు మహిళా టీమ్ఇండియా వెళ్లాల్సింది. కానీ, కరోనా కారణంగా ఆ షెడ్యూల్ను సెప్టెంబర్కు వాయిదా వేశారు.
ద్వైపాక్షిక సిరీస్ కోసం యోచన!
సెప్టెంబర్లో దక్షిణాఫ్రికా, ఇంగ్లాండ్, భారత్.. ట్రైసిరీస్ను నిర్వహించాలని ఇంగ్లాండ్ క్రికెట్ బోర్డు భావించింది. అయితే భారత జట్టు పర్యటనను రద్దు చేసుకుంటే.. దక్షిణాఫ్రికా, ఇంగ్లాండ్ ఉమెన్ జట్ల మధ్య ద్వైపాక్షిక సిరీస్ నిర్వహించనున్నారు. తొలుత రెండు టీ20లు, నాలుగు వన్డేలు ఆడించాలని నిర్ణయించినా.. ఈ సీజన్లో సాధ్యమైనంత ఎక్కువ మ్యాచ్లను జరపడానికి ప్రణాళికను రచిస్తున్నారు. ఈ సిరీస్లోని మ్యాచ్లను డెర్బీ వేదికగా నిర్వహించే అవకాశం ఉంది.
ప్రపంచకప్నకు సన్నద్ధం
వచ్చే ఏడాది ఫిబ్రవరి-మార్చిలో న్యూజిలాండ్ వేదికగా ఐసీసీ ఉమెన్స్ వన్డే ప్రపంచకప్ జరగనుంది. దీంతో ద్వైపాక్షిక సిరీస్లను నిర్వహించి తగిన ప్రాక్టీస్తో వరల్డ్కప్కు సన్నద్ధమయ్యే విధంగా.. ఆయా దేశాల క్రికెట్ బోర్డులు మ్యాచ్లను షెడ్యూల్ చేస్తున్నారు.
ఇంగ్లాండ్ క్రికెటర్లకు శిక్షణ ప్రారంభం
ఇంగ్లాండ్కు చెందిన మహిళా క్రికెటర్లు ఆ దేశంలోని ఆరు వేర్వేరు వేదికల్లో ఇప్పటికే శిక్షణ పొందుతున్నారు. మహిళా క్రికెటర్ల పట్ల ఇంగ్లాండ్ క్రికెట్ బోర్డు నిబద్ధతతో ఉంది. దాని ప్రకారం గత నెలలో బోర్డులోని 20 మంది దేశీయ క్రీడాకారిణిలకు కాంట్రాక్టులను ప్రకటించింది.
