ఐసీసీ 12వ ప్రపంచకప్ టోర్నీ రేపటి (గురువారం) నుంచి ప్రారంభం కానుంది. ఈ క్రికెట్ సంగ్రామానికి ఇంగ్లండ్, వేల్స్లోని 11 మైదానాలు అతిథ్యమివ్వనున్నాయి. 11 మైదానాల్లో 48 మ్యాచ్లు జరగనున్నాయి. జులై 14న ఫైనల్ మ్యాచ్ చారిత్రక లార్డ్స్ మైదానంలో జరగనుంది. మరి ఇంత గ్రాండ్ టోర్నీకి ఆతిథ్యమిస్తోన్న మైదానాల విశేషాలపై ఓ లుక్కేయండి.
లార్డ్స్, లండన్
205 ఏళ్ల చరిత్ర ఉన్న అత్యంత ప్రాచీన మైదానంగా... క్రికెట్ మక్కాగా గుర్తింపు పొందిన స్టేడియం లార్డ్స్. ఇక్కడ 1884లోనే ఓ టెస్టు మ్యాచ్ను నిర్వహించారు. 1972 నుంచి వన్డే మ్యాచ్లకు ఆతిథ్యమిస్తోందీ స్టేడియం.
1983లో భారత కెప్టెన్ కపిల్దేవ్ వరల్డ్‌కప్‌ను ముద్దాడింది లార్డ్స్లోనే. నాట్‌వెస్ట్ సిరీస్ విజయ సంబరాల్లో సౌరభ్ గంగూలీ చొక్కావిప్పి సింహనాదం చేసిందీ ఇక్కడే. ఇంగ్లండ్‌లో ఇప్పటి వరకు నాలుగు వరల్డ్‌కప్‌లు జరిగితే ఆ నాలుగుసార్లు ఫైనల్ వేదిక ఇదే. ఈసారి ఫైనల్ సహా మొత్తం ఐదు మ్యాచ్లకు ఆతిథ్యమివ్వనుంది లార్డ్స్. అయితే లీగ్ దశలో భారత్ ఆడే ఒక్క మ్యాచ్ కూడా ఇక్కడ జరగకపోవడం మన అభిమానులను నిరాశ పరిచే అంశమే. విరాట్ సేన ఫైనల్ చేరితే లార్డ్స్‌లో భారత్ ఆటను మ్యాచ్ చూసే అవకాశం వస్తుంది.
ప్రత్యేకతలు : దక్షిణ.. పడమరల్లో 8 అడుగుల 2 అంగులాలు ఎక్కువగా గ్రౌండ్ విస్తరించి ఉంటుంది.
సామర్థ్యం: 28వేలు
నిర్వహణ: ఫైనల్తో కలిపి 5 మ్యాచ్లు
ఎడ్జ్బాస్టన్, బర్మింగ్‌హామ్
2013లో ఐసీసీ ఛాంపియన్స్ ట్రోపీ ఫైనల్కు ఆతిథ్యమిచ్చింది ఎడ్జ్బాస్టన్ స్టేడియం. 1882లో నిర్మించిన ఈ స్టేడియంలో 1902లో తొలి టెస్టు మ్యాచ్, 1972లో తొలి వన్డే జరిగింది. 1999 వరల్డ్కప్ సెమీఫైనల్లో ఆస్ట్రేలియా, దక్షిణాఫ్రికాల మధ్య టైగా ముగిసిన మ్యాచ్ జరిగింది ఇక్కడే. ఈ మైదానంలో భారత రికార్డు అద్భుతంగా ఉంది. మొత్తం 10 మ్యాచ్లు ఆడిన టీమిండియా ఏడు గెలిచి, మూడు మ్యాచ్లు ఓడింది. జూన్ 30న ఇంగ్లండ్తో, జులై 2న బంగ్లాదేశ్తో భారత్ తలపడేది ఇక్కడే.
సామర్థ్యం: 25వేలు
నిర్వహణ: సెమీఫైనల్ సహా 5 మ్యాచ్లు
బ్రిస్టల్ - కంట్రీ గ్రౌండ్
1983 నుంచి ఈ మైదానంలో అంతర్జాతీయ మ్యాచ్లు జరుగుతున్నాయి. ఇక్కడ ఇప్పటి వరకు టెస్టు మ్యాచ్ జరగలేదు. ఈ సారి మూడు వరల్డ్కప్ మ్యాచ్లకు ఆతిథ్యమివ్వనున్న బ్రిస్టల్ మైదానం... సామర్థ్యం పరంగా చిన్నది. ఈ వేదికపైనే అత్యధిక పరుగులు చేశాడు మాస్టర్ బ్లాస్టర్ సచిన్ తెందూల్కర్.
సామర్థ్యం: 17వేల 500
నిర్వహణ: 3 మ్యాచ్లు
సోఫియా గార్డెన్స్, కార్డిఫ్
వేల్స్లోని సోఫియా గార్డెన్స్ క్రికెట్ మైదానం ఈసారి 4 మ్యాచ్లకు ఆతిథ్యమివ్వనుంది. ప్రస్తుత ప్రపంచకప్నకు ఆతిథ్యమిస్తోన్న స్టేడియాల్లో రెండో చిన్నది ఇది. దీన్నే స్వాలెక్ స్టేడియం అంటారు. 1999 వరల్డ్కప్ తర్వాత ఇక్కడ ప్రపంచకప్ మ్యాచ్లు జరగలేదు. చివరిసారిగా 2017 ఛాంపియన్స్ ట్రోఫీ సెమీఫైనల్‌కు వేదికైంది సోఫియా గార్డెన్స్.
సామర్థ్యం: 15వేల 200
నిర్వహణ: 4 మ్యాచ్లు
రివర్ సైడ్ గ్రౌండ్, చెస్టర్లీ స్ట్రీట్
మూడు మ్యాచ్లకు ఆతిథ్యమివ్వనున్న చెస్టర్లీ స్ట్రీట్ మైదానం పేస్‌తో పాటు స్వింగ్‌కు అనుకూలించనుంది. 1995లో దీన్ని నిర్మించారు. 1999 వరల్డ్కప్ నుంచి అంతర్జాతీయ మ్యాచ్లకు ఆతిథ్యమిస్తున్న ఈ మైదానంలో ఇప్పటివరకు మొత్తం 16 మ్యాచ్‌లే జరిగాయి.
సామర్థ్యం: 19 వేలు
నిర్వహణ: 3 మ్యాచ్లు
లీడ్స్, హెడింగ్లే
లార్డ్స్ తర్వాత పురాతన మైదానంగా గుర్తింపు ఉన్న లీడ్స్ హెడింగ్లే స్టేడియం ఇప్పటి వరకు 12 ప్రపంచకప్ మ్యాచ్లకు ఆతిథ్యమిచ్చింది. ప్రస్తుతం దీన్ని ఎమరాల్డ్ హెడింగ్లే క్రికెట్ స్టేడియంగా పిలుస్తున్నారు. వాతావరణం మేఘావృతమై ఉంటే ఈ పిచ్ పేసర్లకు చక్కటి సహకారం ఇస్తుంది. ఈ మైదానంలోనే క్రికెట్ లెజెండ్ డాన్ బ్రాడ్‌మన్ రెండు ట్రిపుల్ సెంచరీలు చేశారు.
సామర్థ్యం: 18వేల 350
నిర్వహణ: 4 మ్యాచ్లు( జూలై 6న భారత్ X శ్రీలంక )
ఓవల్, లండన్
రేపటి (మే 30) ఆరంభ మ్యాచ్కు ఆతిథ్యమివ్వనుంది ఓవల్ మైదానం. వంద టెస్టు మ్యాచ్లకు ఆతిథ్యమిచ్చిన తొలి స్టేడియంగానే కాకుండా.. టెస్టు చరిత్రలో తొలి వేదికగా దీనికి ప్రత్యేక గుర్తింపు ఉంది. 1845లో నిర్మించిన ఈ స్టేడియంలో... తొలి టెస్టు 1880లో జరిగింది. 1973 నుంచి ఇక్కడ వన్డే మ్యాచ్లు జరుగుతున్నాయి. 2014 మే నెలలో తొలి టీ20 మ్యాచ్ నిర్వహించారు. దీన్ని ప్రస్తుతం కియా ఓవల్గా పిలుస్తున్నారు. ఇప్పటివరకు 10 వరల్డ్కప్ మ్యాచ్లకు ఆతిథ్యమిచ్చింది ఈ స్టేడియం. పేసర్లకు స్వర్గధామం వంటి ఈ పిచ్‌పై బ్యాటింగ్ కష్టమనే చెప్పొచ్చు.
సామర్థ్యం: 25,500
నిర్వహణ: 5 మ్యాచ్లు( ఆస్ట్రేలియా X భారత్ మ్యాచ్ )
ఓల్డ్ ట్రఫార్డ్, మాంచెస్టర్
ఇప్పటివరకు నాలుగు వరల్డ్కప్ మ్యాచ్లకు ఆతిథ్యమిచ్చిన ఓల్డ్ ట్రఫార్డ్ స్టేడియం ఇప్పుడు సెమీఫైనల్ సహా ఆరు మ్యాచ్లకు వేదిక. పేస్‌కు అనుకూలించే పిచ్‌పై స్వింగ్ రాబట్టగలిగే బౌలర్లు ఇక్కడ సత్తాచాటే అవకాశం ఉంది.
సామర్థ్యం: 26వేల 600
ట్రెంట్ బ్రిడ్జ్, నాటింగ్‌హామ్
గతేడాది ఇంగ్లాండ్ పర్యటనలో భాగంగా భారత స్పిన్నర్ కుల్దీప్ యాదవ్ 6 వికెట్లు పడగొట్టింది ట్రెంట్బ్రిడ్జ్ స్టేడియంలోనే. పేస్‌తో పాటు స్పిన్‌కూ అనుకూలిస్తుంది. వన్డేల్లో అత్యధిక స్కోరు నమోదైంది ఇక్కడే. ఆస్ట్రేలియాతో మ్యాచ్‌లో ఇంగ్లండ్ బ్యాట్స్‌మెన్ 6 వికెట్లకు 481 పరుగులు చేసి ప్రపంచ రికార్డు నమోదు చేశారు.
సామర్థ్యం: 17వేల 500
నిర్వహణ: 5 మ్యాచ్లు(జూన్ 13- భారత్ X న్యూజిలాండ్)
రోజ్ బౌల్, సౌతాంప్టన్
రోజ్ బౌల్ స్టేడియంలో 2003 నుంచి వన్డే మ్యాచ్లు నిర్వహిస్తున్నారు. 2008లో మరమ్మతుల కారణంగా మూసివేసి 2015లో మళ్లీ అందుబాటులోకి తీసుకొచ్చారు. వరల్డ్‌కప్‌నకు ఆతిథ్యమిస్తున్న అన్ని స్టేడియాల్లో నూతనమైనదిదే. ఈ ప్రపంచకప్లో 5 మ్యాచ్లకు ఆతిథ్యమివ్వనుంది. ఈ మైదానంలో ప్రపంచకప్ మ్యాచ్ జరగడం ఇదే తొలిసారి.
సామర్థ్యం: 17,000
నిర్వహణ: 5 మ్యాచ్లు( జూన్ 5న భారత్ X దక్షిణాఫ్రికా, జూన్ 22న భారత్ X అఫ్గానిస్థాన్)
కంట్రీ గ్రౌండ్, టాంటన్
మెగాటోర్నీకి ఆతిథ్యమిస్తున్న అన్ని మైదానాల్లో తక్కువ సామర్థ్యం కలిగినది టాంటన్. 1882లో ప్రారంభమైన ఈ స్టేడియంలో 1983లో తొలి వన్డే మ్యాచ్ను నిర్వహించారు. 1999 వరల్డ్‌కప్‌లో శ్రీలంకపై గంగూలీ 183, ద్రవిడ్ 145 పరుగులతో అదరగొట్టారు.
