బంతి వేయకముందే క్రీజు దాటిన బ్యాట్స్మన్ను ఔట్ చేసే వివాదాస్పద సమస్యపై.. తన ఐపీఎల్ కోచ్ రికీ పాంటింగ్తో సంభాషించినట్లు టీమ్ఇండియా స్పిన్నర్ రవిచంద్రన్ అశ్విన్ తెలిపాడు. టెలిఫోన్ కాన్ఫరెన్స్ ద్వారా చర్చించిన ఈ వివరాలను వచ్చే వారం వెల్లడిస్తానని పేర్కొన్నాడు. యూఏఈలో లీగ్ నిర్వహణకు ముందు మన్కడింగ్ పద్దతిపై పాంటింగ్ స్పందిస్తూ.. అశ్విన్తో ఈ వివాదాస్పద పద్దతిపై చర్చిస్తామని చెప్పాడు. దీంతో ఈ విషయం చర్చనీయాశంగా మారింది.
గతేడాది ఐపీఎల్‌లో రాజస్థాన్‌ రాయల్స్‌ బ్యాట్స్‌మన్‌ జాస్‌ బట్లర్‌ను కింగ్స్‌ ఎలెవన్‌ పంజాబ్‌ సారథిగా ఉన్న అశ్విన్ మన్కడింగ్ చేశాడు. మైదానంలోనే బట్లర్‌ దీనిపై అసహనం వ్యక్తం చేశాడు. చాలామంది క్రీడాస్ఫూర్తికి విరుద్ధంగా పేర్కొన్నారు.
ఈ సీజన్లో అశ్విన్ దిల్లీ క్యాపిటల్స్ తరఫున ఆడేందుకు దుబాయ్ చేరుకున్నాడు. పాంటింగ్ వచ్చే వారం రానున్నాడు. ఇరువురి మధ్య జరిగిన సంభాషణను అశ్విన్ వివరించే ముందు.. వ్యక్తిగతంగా కలిసి మాట్లాడుకోనున్నారు.
మన్కడింగ్ చేసినప్పుడు బౌలర్‌కు 'ఫ్రీ బాల్‌' ఇస్తే బాగుంటుందని సోమవారం అశ్విన్ సూచించాడు. "అవును.. అప్పుడు బౌలర్‌కు ఫ్రీ బాల్‌ ఇవ్వండి. బంతి వేసేముందే బ్యాట్స్‌మన్‌ క్రీజు దాటితే బ్యాటింగ్‌ జట్టు నుంచి 5 పరుగులు తగ్గించాలి. ఫ్రీహిట్‌తో లాభమంతా బ్యాట్స్‌మన్‌కే కదా. అలాగే బౌలర్లకూ అవకాశం ఇవ్వండి" అని అశ్విన్ కోరాడు.
