'భారత్​పై ఓటమి నా కెరీర్​కు మేలుకొలుపు'

భారత్​ చేతిలో టెస్టు సిరీస్​ ఓడిపోవడం తన కోచింగ్​ కెరీర్​కు మలుపులాంటిదని, ఆ పరాజయం తనకు చాలా నేర్పిందని ఆస్ట్రేలియా ప్రధాన కోచ్ జ‌స్టిన్ లాంగర్ చెప్పాడు.

స్వదేశంలో టీమిండియా చేతిలో టెస్టు సిరీస్ ఓడిపోవడం.. త‌న కోచింగ్ కెరీర్‌కు మేలుకొలుపు లాంటిద‌ని అన్నాడు ఆస్ట్రేలియా ప్రధాన కోచ్ జ‌స్టిన్ లాంగర్. తన కెరీర్​లోనే ఇదో కీలక ఘట్టమని చెప్పాడు. 2018-19లో జ‌రిగిన ఈ సిరీస్‌ను 2-1 తేడాతో కోహ్లీసేన సొంతం చేసుకుంది. ఈ ఓటమిపై తాజాగా స్పందించిన లాంగర్.. తన అనుభవాలను పంచుకున్నాడు.

"భార‌త్ చేతిలో టెస్టు సిరీస్ ఓటమి.. నా కోచింగ్ కెరీర్​కు మలుపు. మరో పదేళ్ల తర్వాత జీవితాన్ని చూసుకుంటే ఈ సంఘటన గుర్తుండిపోతుంది. 2001లోనూ న‌న్ను జ‌ట్టు నుంచి త‌ప్పించారు. 31 ఏళ్ల వ‌య‌సులో ఇక నా ప‌ని అయిపోయింద‌నుకున్నా. కానీ నన్ను ఈ క్లిష్ట ప‌రిస్థితులే జీవితంలో ఓ వ్యక్తిగా, క్రికెటర్​గా ఎలా నిల‌దొక్కుకోవాలో నేర్పించాయి. జీవితంలో ఇలాంటి పరిస్థితుల వల్ల అద్భుత‌మైన వ్య‌క్తిగా మారేందుకు అవ‌కాశం ల‌భిస్తుంది"

-జస్టిన్ లాంగ‌ర్, ఆస్ట్రేలియా ప్రధాన కోచ్​

2018లో ద‌క్షిణాఫ్రికాతో జ‌రిగిన‌ టెస్టు సిరీస్‌లో బాల్ ట్యాంపరింగ్​కు పాల్పడినందుకు అప్ప‌టి కెప్టెన్ స్టీవ్ స్మిత్, వార్న‌ర్‌పై నిషేధం విధించింది. అప్పుడు కోచ్​గా ఉన్న లీమన్ స్థానంలో బాధ్యతలు అందుకున్నాడు లాంగర్.

ఇదీ చూడండి : ఆన్​లైన్​ శిక్షణ ఇస్తూ ధోనీ, అశ్విన్ బిజీ బిజీ