2000లోని టీమ్ఇండియాలో గంగూలీ, సచిన్, ద్రవిడ్, లక్ష్మణ్, సెహ్వాగ్ లాంటి అద్భుతమైన బ్యాట్స్మెన్ ఉన్నారు. అలాంటి ఆ సమయంలో మరో క్రికెటర్ దేశీయంగా ఎంత బాగా ఆడినా సరే, భారత జట్టులో చోటు దక్కించుకోవాలంటే చాలా కష్టంగా ఉండేది. దీంతో చాలామంది ఆటగాళ్లకు అవకాశాల్లేక తెరవెనుకే ఉండిపోయారు. అలాంటి వారిలో సుబ్రహ్మణ్యం బద్రీనాథ్ ఒకడని చెప్పాడు మాజీ బౌలర్ లక్ష్మీపతి బాలాజీ. ఓ సెషన్లో ఎన్ని పరుగులు కొడతాడో తను ముందే చెప్పేసేవాడని అన్నాడు. అతడితో తనకున్న అనుబంధాన్ని 'ఫార్ములా ఫర్ సక్సెస్' యూట్యూబ్ షోలో పంచుకున్నాడు.
"ఎవరైనా క్రికెటర్ సెంచరీ కొడతానని మ్యాచ్కు ముందే చెప్పడం మీరు ఎప్పుడైనా విన్నారా? 2005లో నాకు బద్రీనాథ్ విషయంలో అలాంటి అనుభవమే ఎదురైంది. ఒకానొక దశలో బెస్ట్ స్పిన్నర్లు బౌలింగ్ చేస్తుండగా, గంటలో శతకం కొడతానని బద్రీ నాతో చెప్పాడు. ఆ సెషన్లో బౌలర్లను ఆడుకుని తను అన్నట్లే చేశాడు"
-లక్ష్మీపతి బాలజీ, భారత మాజీ బౌలర్
బద్రీనాథ్, తన తొలి రంజీ మ్యాచ్లో కేవలం ఓ సెషన్లోనే సెంచరీ చేసిన విషయాన్ని గుర్తు చేసుకున్నాడు బాలాజీ. ఓ సందర్భంలో ఆరోగ్యం సహకరించకున్నా సరే బ్యాటింగ్ చేసి, ఓ మ్యాచ్ను గెలిపించాడని అన్నాడు.
దేశీయ క్రికెట్లో 10, 245 పరుగులు చేసిన బద్రీనాథ్.. భారత్ తరఫున 2 టెస్టులు, 7 వన్డేలు, ఓ టీట్వంటీ ఆడాడు. ఐపీఎల్లోనూ చెన్నై సూపర్కింగ్స్కు ప్రాతినిధ్యం వహించి 1441 పరుగులు చేశాడు.
