ఐపీఎల్ను ఈ ఏడాది కచ్చితంగా నిర్వహిస్తామని బీసీసీఐ ఛైర్మన్ సౌరవ్ గంగూలీ ఇటీవలే చెప్పారు. అయితే ఈ మాటలు, క్రికెటర్లు భరోసా ఇచ్చాయని భారత మాజీ ఆల్రౌండర్ ఇర్ఫాన్ పఠాన్ అభిప్రాయపడ్డాడు. కరోనా ప్రభావంతో ఆస్ట్రేలియాలో టీ20 ప్రపంచకప్ జరపడం కష్టమని తాజాగా ఓ ఇంటర్వ్యూలో వెల్లడించాడు.
"ఐపీఎల్ను నిర్వహించేందుకు తమవంతు ప్రయత్నం చేస్తున్నామని గంగూలీ ఇచ్చిన ప్రకటనను చదివాను. టోర్నీ జరగాలని అందరూ కోరుకుంటున్నారు. ఆస్ట్రేలియాలో జరగాల్సిన ప్రపంచకప్ గురించి చాలామంది మాట్లాడుతున్నారు. నాకు దానిపై సందేహాలున్నాయి. ఆస్ట్రేలియాలో నియమాలను కచ్చితంగా పాటిస్తారు. సమస్య ఎంత చిన్నదైనా వారి కట్టుబాట్ల ప్రకారం వెళ్తారు. ప్రపంచకప్ను ఎలా నిర్వహించాలి.. దానికి సంబంధించిన నియమాలను ఎలా పాటించాలనేది ప్రస్తుతం పరిశీలిస్తున్నారు. బీసీసీఐ అధ్యక్షుడు గంగూలీ.. ఐపీఎల్ను కచ్చితంగా నిర్వహిస్తామని చేసిన వ్యాఖ్యలు, భారత యువక్రికెటర్లకు భరోసా ఇచ్చాయి. ఆ టోర్నీ ఎప్పుడు జరుగుతుందా అని నేను ఎదురుచూస్తున్నా"
- ఇర్ఫాన్ పఠాన్, భారత మాజీ ఆల్రౌండర్
టీ20 ప్రపంచకప్ నిర్వహించాలని ఆస్ట్రేలియా బోర్డుకు ఆదేశాలు వస్తే.. ప్రస్తుత పరిస్థితుల దృష్ట్యా, ఆ దేశం కచ్చితంగా నియమ నిబంధనలను పాటిస్తుందని ఇర్ఫాన్ పఠాన్ ఆశాభావం వ్యక్తం చేశాడు. అయితే ఈ టోర్నీ భవిష్యత్తుపై... జులైలో ఐసీసీ సమావేశం ఏర్పాటు చేసి, తుది నిర్ణయం తీసుకోనుంది.
ఐపీఎల్ మ్యాచ్లు జరిపేందుకు సిద్ధంగా ఉండాలని ఇటీవలే రాష్ట్ర క్రికెట్ సంఘాలకు సూచించారు గంగూలీ. మరోవైపు కరోనా సంక్షోభ సమయంలో టీ20 ప్రపంచకప్ను నిర్వహించడం అసాధ్యమని క్రికెట్ ఆస్ట్రేలియా తాజాగా వెల్లడించింది. దీంతో ఐపీఎల్ నిర్వహణకు మార్గం సుగమమైంది. ఐపీఎల్ను సెప్టెంబరు 26 నుంచి నవంబరు 8 వరకు జరపాలని బీసీసీఐ భావిస్తోంది.
ఇదీ చూడండి... వైద్యుడ్ని సస్పెండ్ చేసిన చెన్నై సూపర్ కింగ్స్
