ఫుట్బాల్ స్టార్ రొనాల్డోకు ప్రపంచవ్యాప్తంగా అభిమానులున్నారు. ఎందరో ఆటగాళ్లు అతడిని స్ఫూర్తిగా తీసుకున్నారు. అలాంటి రొనాల్డోపై తాజాగా టీమ్ఇండియా క్రికెటర్ రోహిత్ శర్మ ప్రశంసల జల్లు కురిపించాడు. ఫేస్బుక్లో బంగ్లాదేశ్ ఆటగాడు తమీమ్ ఇక్బాల్తో లైవ్లో పాల్గొన్న హిట్మ్యాన్ ఈ పోర్చుగీస్ ఆటగాడి గురించి స్పందించాడు. అతడో కింగ్ అంటూ కితాబిచ్చాడు.
"రొనాల్డోను ఎవరు ఇష్టపడరు? అతడో కింగ్. కెరీర్లో అతడు సాధించిన విజయాలు అసాధారణమైనవి. అతడి విజయాలను ప్రశంసించకుండా ఉండలేం. ఓ సాధారణమైన వ్యక్తిగా వచ్చి ఇతంటి ఘనకీర్తి పొందడం అంత తేలిక కాదు. కష్ట సమయంలోనూ తోడుండి అతడి వెంటే నడిచిన ప్రతి ఒక్కరికీ అభినందనలు."
కరోనా లాక్డౌన్ కారణంగా ప్రస్తుతం ఇంటివద్దే కుటుంబంతో గడుపుతున్నాడు రోహిత్. తరచుగా లైవ్చాట్స్లో పాల్గొంటూ పలు విషయాలను అభిమానులతో పంచుకుంటున్నాడు.
