కరోనా వల్ల ఆగిపోయిన క్రికెట్ కార్యకలాపాలు మళ్లీ పుంజుకుంటున్నాయి. ఇప్పటికే ఐపీఎల్తో మంచి జోష్ రాగా.. ఇదే క్రమంలో దేశవాళీ క్రికెట్ పునః ప్రారంభానికి బీసీసీఐ సిద్ధమవుతోంది. అయితే, కరోనా వ్యాప్తిని దృష్టిలో ఉంచుకుని దేశవాళీ పోటీల షెడ్యూల్ బ్లూ ప్రింట్ను అన్ని రాష్ట్ర క్రికెట్ సంఘాలకు పంపింది భారత క్రికెట్ బోర్డు. ఇందులో వారికి నాలుగు ఆప్షన్లను ఇచ్చింది.
ఆప్షన్-1: కేవలం రంజీ ట్రోఫీ మాత్రమే నిర్వహించడం.
ఆప్షన్-2: కేవలం సయ్యద్ ముస్తాక్ అలీ టీ20 టోర్నీ జరపడం.
ఆప్షన్-3: రంజీ ట్రోఫీతో పాటు సయ్యద్ ముస్తాక్ అలీ టీ20 టోర్నీ కూడా నిర్వహించడం.
ఆప్షన్-4: సయ్యద్ ముస్తాక్ అలీ టీ20 టోర్నీతో పాటు విజయ్ హజారే ట్రోఫీ జరపడం.
ఈ ఆప్షన్లలో అత్యధిక రాష్ట్ర సంఘాలు దేనివైపు మొగ్గుచూపితే ఆ విధంగా దేశవాళీ క్రికెట్ను ముందుకు తీసుకెళ్లాలని బీసీసీఐ యోచిస్తోంది. రంజీ ట్రోఫీకి(జనవరి 11-మార్చి 18) 67 రోజులు, సయ్యద్ ముస్తాక్ అలీ టోర్నీకి(డిసెంబర్ 20-జనవరి 10)22 రోజులు, విజయ్ హజారే టోర్నీకి(జనవరి 11-ఫిబ్రవరి 7)28 రోజులు అవసరమవుతాయని లేఖలో పేర్కొంది బోర్డు.
దేశవాళీ క్రికెట్లో పాల్గొనే 38 జట్ల కోసం దేశం మొత్తం మీద 6 బయో సెక్యూర్ బుడగలను ఏర్పాటు చేయనున్నట్లు తెలిపింది బోర్డు. ఒక్కో బుడగ ఆధ్వర్యంలో మూడు మైదానాలు ఉండేలా ప్రణాళికలు సిద్ధం చేస్తున్నట్లు వెల్లడించింది.
ఇదీ చూడండి: ఐపీఎల్ వేలం కోసమే ముస్తాక్ అలీ టోర్నీ నిర్వహణ!
