ప్రస్తుతం క్రికెట్ అభిమానులు ఎంతో ఆసక్తిగా ఎదురు చూస్తున్న ఏకైక టోర్నమెంట్ ఐపీఎల్. కరోనాతో లభించిన సుదీర్ఘ విరామం అనంతరం అంతర్జాతీయ స్థాయిలో జరుగుతున్న అతిపెద్ద లీగ్ ఇదే కావడం విశేషం. ఈ క్రమంలోనే యూఏఈ వేదికగా జరిగే ఈ టోర్నమెంటుకు ఆటగాళ్లంతా మరింత హుషారుతో సన్నద్దమవుతున్నారు.
అయితే, ఐపీఎల్ ప్రారంభించినప్పటి నుంచి ఇప్పటి వరకు ఎంతో మంది స్టార్ క్రికెటర్లు ప్రేక్షకులను తమ ప్రదర్శనతో అలరించారు. అనతి కలంలోనే వారు ఆయా జట్లకు సారథ్యం వహించారు. ప్రస్తుతం వారు అదే ఐపీఎల్ పలు జట్లకు కోచ్లుగా విధులు నిర్వర్తిస్తున్నారు. అలా కెప్టెన్ నుంచి కోచ్లుగా మారిన ప్రముఖ క్రికెటర్లెవరో తెలుసుకుందాం రండి.
భారత మాజీ స్పిన్నర్ అనీల్ కుంబ్లే తన హోం ఫ్రాంచైజీ రాయల్ ఛాలెంజర్స్ బెంగళూరు(ఆర్సీబీ) తరఫున ఐపీఎల్ తొలి మూడు సీజన్లలో ఆడాడు. 2009లో దక్షిణాఫ్రికాలో జరిగిన ఐపీఎల్ ఫైనల్లో జట్టుకు సారథ్యం వహించి.. ఫైనల్ వరకు తీసుకొచ్చాడు. అయితే అప్పుడు ఆర్సీబీ జట్టు డక్కన్ ఛార్జర్స్ చేతిలో పరాజయం పొందింది.
ప్రస్తుతం కింగ్స్ ఎలెవెన్ పంజాబ్ జట్టుకు ప్రధాన కోచ్గా వ్యవహరిస్తున్నాడు కుంబ్లే. తన శిక్షణలో గొప్ప ఆటగాళ్ల బృందాన్ని ఏర్పాటు చేశాడు. కుంబ్లే తన ఐపీఎల్ కెరీర్లో 42 మ్యాచ్లు ఆడి 45 వికెట్లు పడగొట్టాడు. 26 మ్యాచ్ల్లో ఆర్సీబీకి నాయకత్వం వహించగా.. 15 మ్యాచ్లు గెలిపించాడు.
ఐపీఎల్ మొదటి మూడు సీజన్లలో న్యూజిలాండ్ మాజీ కెప్టెన్ బ్రెండన్ మెక్కల్లమ్ కోల్కతా నైట్రైడర్స్(కేకేఆర్) తరఫున ఆడాడు. అనంతరం 2012-13 మధ్య జరిగిన లీగ్లో మరోసారి కనువిందు చేశాడు. 2009లో మెక్కల్లమ్ కేకేఆర్ జట్టుకు కెప్టెన్గా వ్యవహరించినప్పటికీ.. ఆ ఏడాది ఐపీఎల్ టాప్ నాలుగు స్థానాల్లో జట్టు నిలవలేకపోయింది. సరిగ్గా ఏడు సంవత్సరాల తర్వాత కివీస్ ఆటగాడు గుజరాత్ లయన్స్కు సారథిగా బాధ్యతలు చేపట్టాడు. ప్రస్తుతం 2020 ఐపీఎల్ కోసం కేకేఆర్ ప్రధాన కోచ్గా నియమితుడయ్యాడు.
ఈ వరుసలో నిలిచిన మరో స్టార్ క్రికెటర్ రికీ పాంటింగ్. 2013 వరకు అతనికి ఐపీఎల్ జట్టుకు నాయకత్వం వహించే అవకాశం దక్కలేదు. అనంతరం ముంబయి ఇండియన్స్ అతన్ని కెప్టెన్గా నియమించింది. కానీ, ఆరు మ్యాచ్ల తర్వాత తనకు తానే తప్పుకున్నాడు. అప్పుడు రోహిత్ శర్మ కొత్త సారథిగా ఎన్నికయ్యాడు. 2018లో పాంటింగ్ను దిల్లీ క్యాపిటల్స్కు ప్రధాన కోచ్గా ఎంపిక చేశారు. గతేడాది ఐపీఎల్లో జట్టును మూడో స్థానానికి వెళ్లడంలో, ఆటగాళ్లకు మార్గనిర్దేశం చేయడంలో బాగా కృషి చేశాడు. ఈ సారి ఎలాగైనా తమ ఫ్రాంచైజీకి టైటిల్ అందించాలని పట్టుదలతో ఉన్నాడు.
ఇక మాజీ శ్రీలంక కెప్టెన్ మహేలా జయవర్ధనే 2010లో కింగ్స్ ఎలెవెన్ పంజాబ్కు కెప్టెన్గా వ్యవహరించి.. అనంతరం కొచ్చి టస్కర్స్ కేరళ(కేటీకే), డిల్లీ డేర్డెవిల్స్(డీడీ)లకు సారథిగా బాధ్యతలు చేపట్టాడు. 2017లో ముంబయి జట్టు కోచింగ్ సిబ్బందిలో రికీ పాంటింగ్ స్థానంలో జయవర్ధనేను నియమించింది. అతని శిక్షణలో ముంబయి మూడు సార్లు టైటిల్ గెలుచుకుంది.
దిల్లీ, కింగ్స్ ఎలెవెన్ పంజాబ్, పుణే వారియర్స్ జట్ల తరఫున ఆడిన ఆటగాడు ఆస్ట్రేలియా పేసర్, ఆల్రౌండర్ జేమ్స్ హోప్స్. తన ఐపీఎల్ కెరీర్లో 417 పరుగులు చేసి.. 14 వికెట్లు పడగొట్టాడు. 2011లో మూడు మ్యాచ్లకు డిల్లీ డేర్డెవిల్స్ జట్టుకు నాయకత్వం వహించాడు. అయితే, ఒక్క మ్యాచ్ కూడా గెలవలేదు. అయినప్పటికీ, 2018లో ఫ్రాంచైజీ అతన్ని ఫాస్ట్ బౌలింగ్ కోచ్గా నియమించింది. మరికొద్ది రోజుల్లో ఐపీఎల్ ప్రారంభం కానున్న వేళ.. టైటిల్ దక్కించుకోవడం కోసం బౌలర్లను సిద్ధం చేస్తున్నాడు.
