ఈ ఏడాది చివర్లో.. టీమ్ఇండియా ఆస్ట్రేలియా పర్యటనకు వెళ్లనుంది. టెస్ట్ సిరీస్లో భాగంగా.. మెల్బోర్న్ వేదికగా డిసెంబర్ 26-30 మధ్య సంప్రదాయ బాక్సింగ్ డే టెస్ట్ జరగాల్సి ఉంది. అయితే మెల్బోర్న్లో కరోనా వైరస్ విజృంభిస్తున్న నేపథ్యంలో ఈ మ్యాచ్ను అడిలైడ్కు తరలించేందుకు క్రికెట్ ఆస్ట్రేలియా యోచిస్తున్నట్టు సమాచారం.
సిడ్నీ మార్నింగ్ హెరాల్డ్ కథనం ప్రకారం.. బాక్సింగ్ డే కోసం మెల్బోర్న్కు ప్రత్యామ్నాయంగా రేసులో అడిలైడ్ ఉంది. ఈ మేరకు క్రికెట్ ఆస్ట్రేలియా ఛైర్మన్ ఈర్ల్ ఎడ్డింగ్స్.. వచ్చే వారంలో అత్యవసర జాతీయ క్రికెట్ కేబినెట్ సమావేశాన్ని నిర్వహించనున్నారు.
కరోనా వైరస్తో విక్టోరియాలో పరిస్థితులు ఆందోళనకరంగా ఉన్నాయని.. ఇలాంటి పరిస్థితుల్లో ప్రస్తుత షెడ్యూల్తోనే మ్యాచ్లు నిర్వహించడం కుదరదని సీనియర్ అధికారి వెల్లడించారు.
భారత్-ఆస్ట్రేలియా మధ్య బ్రిస్బేన్ వేదికగా డిసెంబర్ 3 నుంచి మొదటి టెస్ట్ ప్రారంభంకానుంది. డిసెంబర్ 11-15 మధ్య రెండో టెస్ట్ జరగనుంది. ఇదే భారత్ విదేశాల్లో ఆడనున్న తొలి డే/నైట్ టెస్ట్ మ్యాచ్ కానుంది.
ఇదీ చూడండి:- దిగ్గజ క్రికెటర్ లారాకు కరోనా సోకిందా?
