ఆస్ట్రేలియా మహిళ క్రికెట్ జట్టుపై తయారు చేసిన డాక్యుమెంటరీ 'ది రికార్డ్' ట్రైలర్ను క్రికెట్ ఆస్ట్రేలియా విడుదల చేసింది. వచ్చే శుక్రవారం అమెజాన్ ప్రైమ్ వేదికగా ఇది విడుదల అవుతుంది. 2020 మహిళల టీ20 ప్రపంచకప్ను గెలుపొందిన ఆస్ట్రేలియా జట్టు సాగించిన ప్రయాణమే ఈ డాక్యుమెంటరీ స్టోరీ.
కరోనా వల్ల ప్రపంచం మొత్తం క్రీడలు ఆగిపోవడానికి వారం ముందు ఆస్ట్రేలియా మహిళ క్రికెట్ జట్టు ఒక గుర్తింపును సాధించింది. మెల్బోర్న్ వేదికగా.. అంతర్జాతీయ మహిళ దినోత్సవం నాడు జరిగిన ప్రపంచకప్ ఫైనల్లో ఆస్ట్రేలియా వీరోచితంగా ఆడి ట్రోఫీ గెలుచుకుంది. చాలా మంది ఆటగాళ్లు గాయాలపాలైనప్పటికీ కెప్టెన్ మెక్ లానింగ్ అద్భుతంగా జట్టును నడిపించింది. మానసికంగా, శారీరకంగా వాళ్లలో క్రీడాస్ఫూర్తిని నింపింది.
'ది రికార్డ్'లో ఆస్ట్రేలియా మహిళ జట్టుకు సంబంధించి కొంత మంది ప్లేయర్లు నటించారు. ఆసీస్ కెప్టెన్ మెగ్ లానింగ్, వైస్ కెప్టెన్ రాచెల్ హేన్స్, ప్రధాన కోచ్ మాథ్యూ మట్, ప్లేయర్ ఆఫ్ ది టోర్నమెంట్ బెథ్ మూనీ ఈ డాక్యుమెంటరీలో ఉన్నారు. వీరితో పాటు భారత కెప్టెన్ హర్మన్ప్రీత్ కౌర్, ఇంగ్లాండ్ కెప్టెన్ హీథర్ నైట్, సౌతాఫ్రికా కెప్టెన్ డేన్ వాన్ నైకెర్క్, థాయ్లాండ్ కెప్టెన్ సోర్నారిన్ తిప్పోచ్లు ఉన్నారు.
కాగా ఈ మూవీ ఆస్ట్రేలియా, న్యూజిలాండ్, భారత్, పాకిస్థాన్, శ్రీలంక, యూఎస్, కెనడా, యూకే సహా 20 దేశాలలో అమెజాన్ ప్రైమ్ వేదికగా విడుదల కానుంది.
'ప్రపంచ కప్కు సంబంధించి పూర్తి ప్రయాణం ఆధారంగా ఈ డాక్యుమెంటరీ తీయడం ఆనందంగా ఉంది. క్రికెట్ ఆస్ట్రేలియాకు ఇది ఎంతో గర్వకారణం' అని క్రికెట్ ఆస్ట్రేలియా తాత్కాలిక సీఈఓ నిక్ హాక్లీ పేర్కొన్నాడు.
ఇదీ చదవండి: ఉత్తరాఖండ్ వరద బాధితులకు పంత్ విరాళం
