ఐపీఎల్.. ప్రపంచంలోనే సూపర్ సక్సెస్ లీగ్. ఎందరో అనామక క్రికెటర్లను వెలుగులోకి తెచ్చింది. వారి ప్రతిభను అందరికీ తెలిసేలా చేసింది. టీమ్ఇండియాకు ప్రస్తుతం ఆడుతున్న వారిలో, ఈ లీగ్లో రాణించి వచ్చినవారే ఎక్కువగా ఉంటున్నారు. అయితే ఐపీఎల్.. కొందరు క్రికెటర్ల ఆర్థిక పరిస్థితిని పూర్తిగా మార్చేసిందంటే నమ్మగలరా? అలాంటి వారి గురించే ఈ కథనం.
పాండ్యా బ్రదర్స్
2015లో ముంబయి ఇండియన్స్, కేవలం రూ.10 లక్షలకే బరోడా ఆటగాడు హార్దిక్ పాండ్యాను సొంతం చేసుకుంది. ఆ సీజన్లో తన మార్క్ బ్యాటింగ్తో అలరించిన హార్దిక్.. జాతీయ జట్టులో చోటు దక్కించుకున్నాడు. ప్రస్తుత టీమ్ఇండియాలో కీలక సభ్యుడిగా కొనసాగుతున్నాడు.
హార్దిక్ వచ్చిన తర్వాత ఏడాదే రూ.2 కోట్లు వెచ్చించి అతడి సోదరుడు కృనాల్ను ముంబయి కొనుగోలు చేసింది. అంచనాలకు తగ్గట్లే బ్యాటింగ్, బౌలింగ్లో రాణిస్తూ జట్టులో ప్రధాన ఆటగాడిగా మారాడు.
అయితే వీరిద్దరి కుటుంబ పరిస్థితి ఐపీఎల్ ఆడకముందు వరకు ఆర్థికంగా చాలా ఇబ్బందులు ఎదుర్కొంది. లీగ్లో ఆడటం వల్ల పాండ్యా బ్రదర్స్ ఒక్కసారిగా ధనవంతులైపోయారు.
మహ్మద్ సిరాజ్
హైదరాబాద్కు చెందిన ఓ ఆటో డ్రైవర్ కుమారుడు సిరాజ్. రంజీల్లో బాగా ఆడటం వల్ల 2017 ఐపీఎల్ సీజన్ కోసం సన్రైజర్స్ హైదరాబాద్.. ఇతడిని రూ.2.6 కోట్లకు కొనుగోలు చేసింది. రెండేళ్ల పాటు ఈ జట్టుకు ఆడిన తర్వాత రాయల్ ఛాలెంజర్స్ బెంగళూరు.. ఇతడిని వేలంలో దక్కించుకుంది.
దీంతో సొంత ఇల్లు కట్టుకుని, మంచి జీవితాన్ని అనుభవిస్తున్నాడు సిరాజ్. ప్రస్తుతం ఆస్ట్రేలియా పర్యటనలో టీమ్ఇండియా తరఫున టెస్టు సిరీస్ ఆడుతున్నాడు.
టి.నటరాజన్
నటరాజన్ తల్లిదండ్రులు రోజువారీ కూలీలు. కుమారుడి క్రికెట్ కలను నెరవేర్చేందుకు శాయశక్తులా కష్టపడేవారు. కనీస సదుపాయాలు లేనప్పటికీ ఫాస్ట్ బౌలింగ్లో రాణించే నటరాజన్కు జయప్రకాశ్ అనే వ్యక్తి సాయం చేశాడు. దీంతో తమిళనాడు ప్రీమియర్ లీగ్లో ఆడే అవకాశం దక్కించుకుని, వెలుగులోకి వచ్చాడు.
యార్కర్లు పక్కాగా వేసే ఇతడిని, 2017 వేలంలో పంజాబ్ జట్టు రూ.3 కోట్లకు సొంతం చేసుకుంది. గాయాలవడం వల్ల ఆ సీజన్ పూర్తిగా ఆడలేకపోయాడు. కానీ వచ్చిన మొత్తంతో తన ఇంటి ఆర్థిక పరిస్థితి మెరుగుపరుచుకోవడం సహా సొంతూరిలో క్రికెట్ అకాడమీని కూడా ప్రారంభించాడు.
అయితే ఈ ఏడాది హైదరాబాద్ జట్టు తరఫున అదరగొట్టాడు. ఆస్ట్రేలియా పర్యటనకు నెట్ బౌలర్గా ఎంపికై, అనూహ్యంగా తుదిజట్టులో చోటు దక్కించుకుని ఆకట్టుకునే ప్రదర్శన చేశాడు. సహచరుల నుంచి మాజీల వరకు అందరి ప్రశంసలు అందుకుంటున్నాడు.
యశస్వి జైస్వాల్
ఉత్తరప్రదేశ్కు చెందిన యశస్వి జైస్వాల్కు చిన్నప్పటి నుంచి క్రికెట్ అంటే చాలా ఆసక్తి. కానీ ఆర్థిక పరిస్థితుల వల్ల సొంతూరిని విడిచిపెట్టి, ముంబయికి వచ్చి ఎన్నో సమస్యలను తట్టుకుని నిలబడి క్రికెటర్గా ఎదిగాడు. ఈ క్రమంలో వసతి లేక గుడారాల్లో నివసించడం, ఖర్చులు కోసం పానీపూరి అమ్మడం కూడా చేశాడు.
2019లో భారత్ తరఫున అండర్-19 ప్రపంచకప్లోనూ అదరగొట్టాడు. గతేడాది ఐపీఎల్ వేలంలో రాజస్థాన్ రాయల్స్ ఇతడిని రూ.2.4 కోట్లకు సొంతం చేసుకుంది. దీంతో ఇతడి కుటుంబ ఆర్థిక పరిస్థితి మారిపోయింది.
రింకూ సింగ్
ఉత్తరప్రదేశ్కు చెందిన రింకూ సింగ్ది మధ్య తరగతి కుటుంబం. నాన్న సిలిండర్లు సరఫరా చేసేవారు. ఇద్దరు అన్నలు ఆటో డ్రైవర్, కోచింగ్ సెంటర్లో పనిచేసేవారు. రంజీల్లో ఆడుతున్నా సరే ఆర్థికంగా ఇబ్బందులు ఎదుర్కొన్నాడు. సరిగ్గా అప్పుడే 2018 వేలంలో కోల్కతా నైట్రైడర్స్ ఇతడిని రూ.80 లక్షలకు సొంతం చేసుకుంది. దీంతో రింకూ ఆర్థికంగా స్థిరపడ్డాడు.
ఇవీ చదవండి:
