Bumrah Comeback : భారత స్టార్ బౌలర్ జస్ప్రీత్ బుమ్రా త్వరలోనే జట్టులోకి రానున్నాడా? టీమ్ఇండియా జట్టుతో కలిసి ఐర్లాండ్ వెళ్లనున్నాడా? బెంగళూరులోని ఎన్సీఏలో ఉన్న అతడు పూర్తిగా కోలుకున్నాడా? అనే ప్రశ్నలు ప్రస్తుతం భారత క్రికెట్ అభిమానుల్లో తలెత్తుతున్నాయి. అయితే బుమ్రా ఐర్లాండ్ సిరీస్లో అందుబాటులో ఉంటాడని బీసీసీఐ ఇటీవల సంకేతాలు ఇచ్చింది. కానీ ఇప్పటికీ బుమ్రా విషయంలో స్పష్టమైన క్లారిటీ రాకపోవడం వల్ల భారత క్రికెట్ అభిమానులు సందిగ్ధంలో ఉన్నారు. అయితే టీమ్ఇండియా సారథి రోహిత్ శర్మ ఈ విషయంపై తాజాగా స్పందించాడు.
ప్రస్తుతం విండీస్ పర్యటనలో ఉన్న భారత్ .. గురువారం నుంచి వన్డే మ్యాచ్లు ఆడనుంది. ఈ సందర్భంగా మొదటి మ్యాచ్కు ముందు ప్రెస్మీట్లో పాల్గొన్న రోహిత్ను బుమ్రా పునరాగమనం గురించి ఓ విలేకరి అడగ్గా.. అతడు కీలక వ్యాఖ్యలు చేశాడు. "టీమ్ఇండియాలో బుమ్రా అనుభవజ్ఞుడైన బౌలర్. అతడు జట్టుకు చాలా కీలకం. ప్రస్తుతం అతడు తీవ్ర గాయం నుంచి కోలుకుంటున్నాడు. కానీ ఐర్లాండ్ పర్యటనకు ఇంకా జట్టును ప్రకటించలేదు. అతడు ఆ సిరీస్లో అడతాడో లేదో నాకు తెలియదు. కానీ అతడు ఆడితే మంచిదే. ఎందుకంటే చాలా కాలం విశ్రాంతి తర్వాత ఏ ఆటగాడైనా.. తొందరగా పాత ఫామ్ను అందుకోలేడు. అందుకే బుమ్రా వరల్డ్ కప్ కంటే ముందే జట్టులోకి రీఎంట్రీ ఇస్తాడని అనుకుంటున్నా. కానీ అదంతా అతడు కోలుకునే స్పీడ్పైనే ఉంటుంది. మేము ఎప్పటికప్పుడు ఎన్సీఏతో మాట్లాడుతున్నాం. ప్రస్తుతానికి పరిస్థితులు అనుకూలంగానే ఉన్నాయి" అని రోహిత్ శర్మ అన్నాడు.
అయితే ప్రస్తుతం బెంగళూరులోని ఎన్సీఏలో ఉన్న బుమ్రా.. త్వరగా కోలుకుంటున్నాడని, నెట్ సెషన్లో బౌలింగ్ను మెరుగుపర్చుకుంటున్నాడని ఓ బీసీసీఐ అధికారి తెలిపారు. అయితే ఎన్సీఏ అతడికి ప్రాక్టీస్ గేమ్స్ నిర్వహిస్తోంది. కానీ అతడి ఫిట్నెస్పై బీసీసీఐ పూర్తి క్లియరెన్స్ ఇస్తేనే బుమ్రా తిరిగి అంతర్జాతీయ పునరాగమనం చేస్తాడు.
కాగా బుమ్రా గతేడాది సెప్టెంబరు నుంచి గాయం కారణంగా క్రికెట్కు దూరంగా ఉంటున్నాడు. ఈ ఏడాది వెన్నుముక చికిత్స పూర్తి చేసుకున్న అతడు.. ప్రస్తుతం ఎన్సీఏలో ఉంటున్నాడు. ఇక బుమ్రా వీలైనంత తొందరగా పూర్తి ఫిట్నెస్ సాధించి మళ్లీ జట్టులోకి రీ ఎంట్రీ ఇస్తే.. టీమ్ఇండియాకు బౌలింగ్ కష్టాలు తప్పినట్టే అని క్రికెట్ ప్రియులు అభిప్రాయపడుతున్నారు.
