క్రికెట్ మైదానంలో బరిలోకి దిగే ఆటగాడి ఆయుధాల్లో బ్యాట్ ఒకటి. సాధారణంగా వీటిని ఇంగ్లీష్ విల్లో లేదా కశ్మీర్ విల్లోతో(ఓ రకమైన కలప) తయారు చేస్తారు. అయితే వెదురుతో చేసిన బ్యాట్లను వినియోగిస్తే ఎలా ఉంటుంది? బ్యాట్ తయారీని విల్లోకు బదులు వెదురుతో తయారుచేస్తే ఎన్నో లాభాలు ఉన్నాయని ఓ అధ్యయనం చెబుతుంది. కేమ్బ్రిడ్జ్ యూనివర్సిటీకి చెందిన దార్షిల్ షా, బెన్ టింక్లర్-డేవియెస్ ఈ పరిశోధన చేశారు.
"తక్కువ ధరకే వెదురుతో బ్యాట్ తయారుచేయవచ్చు. కొత్తగా క్రికెట్ ఆడేవారికి ఫోరు కొట్టడానికి బాగా ఉపయోగపడుతుంది. అన్ని రకాల షాట్లు కూడా బాగా ఆడొచ్చు. ఇంగ్లీష్ విల్లోను సరఫరా చేయడంలో ఎన్నో సమస్యలు ఉంటాయి. ఓ చెట్టు పెరగడానికి దాదాపు 15 ఏళ్లు పడుతుంది. దీంతో బ్యాట్ తయారీలో 15 నుంచి 30 శాతం వృథాగా పోతుంది. అదే వెదురు చౌక, సమృద్ధి, వేగంగా దొరుకుతుంది. ఏడేళ్లలోనే వెదురు పెరగడం కలిసొచ్చే అంశం. దీనికి సంబంధించిన చెట్లు ఇప్పుడిప్పుడే క్రికెట్ అభివృద్ధి చెందుతున్న చైనా, జపాన్, దక్షిణా అమెరికా లాంటి దేశాల్లోనూ ఎక్కువగా దొరుకుతాయి. అయితే దీనితో తయారు చేసిన బ్యాట్.. విల్లో బ్యాట్ కన్నా గట్టిగా, బలంగా, పెళుసుగా, బరువుగా ఉంటుంది. దాని బరువు తగ్గించే విధంగా తయారీకి ప్రయత్నిస్తున్నాం"
-దార్షిల్ షా
1979 నుంచి క్రికెటర్లు వాడే బ్యాట్ల రూపురేఖలపై కచ్చితమైన నిబంధన అమల్లోకి వచ్చింది. కలపతో చేసిన వాటినే ఉపయోగించాలని ఐసీసీ స్పష్టం చేసింది. వాటి పరిమాణం 38 అంగుళాల పొడవు, 4.25 అంగుళాల వెడల్పు మాత్రమే ఉండాలని సూచించింది.
ఇదీ చూడండి: విచిత్రమైన ఈ క్రికెట్ బ్యాట్లను ఎప్పుడైనా చూశారా..?
