మంగళవారం నుంచి కొరియా మాస్టర్స్ వరల్డ్ టూర్ 300 టోర్నీ ప్రారంభంకానుంది. వరుస వైఫల్యాలతో సతమతమవుతున్న సైనా నెహ్వాల్ టోర్నీ నుంచి తప్పుకోగా.. టైటిల్ నెగ్గాలనే పట్టుదలతో కిదాంబి శ్రీకాంత్ బరిలోకి దిగుతున్నాడు.
ఈ ఏడాది.. ఇండియా ఓపెన్ గెలిచి జోరుమీద కనిపించాడు భారత స్టార్ షట్లర్ శ్రీకాంత్. ఆ తర్వాత ఆశించిన రీతిలో రాణించలేదు. గాయాల కారణంగా కొన్నాళ్లు ఆటకు దూరమయ్యాడు. హాంకాంగ్‌ సూపర్‌ సిరీస్‌లో సెమీస్‌ చేరుకుని తిరిగి ఫామ్‌ అందుకున్నాడు. కొరియా ఓపెన్ పురుషుల సింగిల్స్‌ తొలిరౌండ్లో వాంగ్‌ వింగ్‌ కి విన్సెంట్‌ (హాంకాంగ్‌)తో తలపడనున్నాడు. ఇప్పటివరకు వీరు తలపడిన మ్యాచ్ల్లో 10-3 తేడాతో శ్రీకాంత్దే పైచేయి.
వరుస ఓపెన్లలో విఫలమవుతూ తొలిరౌండ్‌ కూడా దాటలేక ఇబ్బంది పడుతున్న ప్రపంచ నంబర్‌ 9 క్రీడాకారిణి సైనా నెహ్వాల్.. కొరియా ఓపెన్ నుంచి తప్పుకుంది. వచ్చే వారం లఖ్‌నవూలో నిర్వహించే సయ్యద్‌ మోదీ టోర్నీలో ఈ క్రీడాకారిణి పాల్గొనే అవకాశం ఉంది. సైనా తప్పుకోవడం వల్ల ఇక ఈ టోర్నీలో భారత మహిళల ప్రాతినిధ్యం లేనట్టే.
భారత యువ ఆటగాడు, ప్రపంచ నంబర్‌ 16వ ర్యాంకర్‌ సమీర్‌ వర్మ.. పురుషుల తొలి రౌండ్లో టాప్‌సీడ్‌ షి యు కి (చైనా)తో తలపడనున్నాడు. అతడి సోదరుడు సౌరభ్‌ వర్మ అర్హత పోటీల్లో ఆడనున్నాడు.
ఇవీ చూడండి.. 'నేనూ షమిలా బౌలింగ్ చేయగలను'
