యశ్రాజ్ ఫిలిమ్స్ 50వ వసంతంలోకి అడుగుపెట్టిన సందర్భంగా ఈ ఏడాదిలో భారీ చిత్రాలు తెరకెక్కించడానికి ఆ నిర్మాణ సంస్థ సన్నాహాలు చేస్తోంది. అందులో భాగంగానే ప్రముఖ బాలీవుడ్ కథానాయకుడు అజయ్ దేవగణ్తో ఓ భారీ యాక్షన్ చిత్రానికి రంగం సిద్ధం చేస్తోంది. పూర్తిస్థాయి యాక్షన్ డ్రామాగా రూపొందనున్న ఈ సినిమాలో అజయ్ విభిన్న పాత్రల్లో కనిపిస్తాడని సమాచారం. వాటిల్లో ప్రతినాయక ఛాయలున్న పాత్ర కూడా ఉందని యశ్రాజ్ ఫిలిమ్స్ సన్నిహిత వర్గాలు చెబుతున్నాయి. వైవిధ్యమైన గెటప్ల కోసం ప్రోస్థటిక్స్ను ఉపయోగించనున్నారట.
ఇది సూపర్ హీరో తరహా కథ కాదు కానీ యాక్షన్కు ఎక్కువ ప్రాధాన్యం ఉంటుందని చిత్రవర్గాలు అంటున్నాయి. ఈ చిత్రంలోని యాక్షన్ సన్నివేశాల కోసం నిర్మాత ఆదిత్యా చోప్రా హాలీవుడ్ యాక్షన్ డైరెక్టర్స్తో సంప్రదింపులు జరుపుతున్నారట. 'ది డార్క్ నైట్', 'డన్క్రిక్' తదితర చిత్రాలకు పనిచేసిన టామ్ స్ట్రుథెర్స్, సౌత్ కొరియన్ యాక్షన్ డైరెక్టర్ సీయంగ్ హోలు అజయ్ చిత్రం కోసం పనిచేయనున్నారట. ఈ సినిమా ద్వారా బాలీవుడ్ కథానాయిక అనన్యా పాండే సోదరుడు అహాన్ పాండే తెరకు పరిచయం కాబోతున్నాడు.
