'యోధ' చిత్రం నుంచి బాలీవుడ్ నటుడు షాహిద్ కపూర్ తప్పుకున్నట్లు తెలుస్తోంది. తొలుత ఈ సినిమా చేయడానికి అంగీకరించినా ఇప్పుడు అతడు వైదొలగాలని నిర్ణయించుకున్నట్లు సమాచారం. శషాంక్ ఖైతాన్ దర్శకత్వంలో నిర్మాత కరణ్ జోహార్ ఈ సినిమాను తెరకెక్కించనున్నాడు.
'యోధ'లో షాహిద్ నటిస్తున్నాడని ఇప్పటివరకూ అధికారికంగా ఎలాంటి ప్రకటన వెలువడలేదు. అయినా 'జెర్సీ' చిత్రీకరణ పూర్తి కాగానే ఈ షూటింగ్లో అతడు పాల్గొంటాడని బాలీవుడ్ వర్గాలు చెప్పాయి. ఇటీవలే 'జెర్సీ' పూర్తయింది. కానీ సృజనాత్మక విభేదాల కారణంగా ఈ చిత్రం నుంచి 'కబీర్ సింగ్' నటుడు తప్పుకున్నట్లు సమాచారం.
'కబీర్ సింగ్' భారీ విజయం తర్వాత షాహిద్ స్వభావంలో విపరీతమైన మార్పులు వచ్చాయని 'యోధ' టీమ్ అనుకుంటున్నట్లు ఓ బాలీవుడ్ వెబ్సైట్ వెల్లడించింది. అతడిలో గర్వం, అహంకారం మితిమీరిపోయాయని తెలిపింది. దీంతో షాహిద్తో సయోధ్య కుదురుతుందా లేదా వేరే నటుడితో ఈ సినిమా ముందుకెళ్తుందా అనేది తెలియాల్సి ఉంది.
వెబ్సిరీస్లతో దూకుడు..
'ఫ్యామిలీ మ్యాన్' వెబ్ సిరీస్తో భారీ విజయం దక్కించుకున్న రాజ్, డీకేల దర్శకత్వంలో షాహిద్.. ఓ వెబ్సిరీస్లో నటించనున్నాడు. యాక్షన్-థ్రిల్లర్ జోనర్లో రానున్న ఈ సిరీస్లో తమిళ సూపర్స్టార్ విజయ్ సేతుపతి ఓ కీలక పాత్రలో మెరవనున్నాడు. జనవరి నుంచి ప్రారంభమయ్యే మరో వెబ్సిరీస్లోనూ షాహిద్ నటించనున్నట్లు సమాచారం.
ఇదీ చూడండి: 'సుప్రీమ్' హీరో సినిమాపై మెగాస్టార్.. రష్మిక బాలీవుడ్ ఎంట్రీ
