RRR Movie: దర్శకధీరుడు రాజమౌళి సినిమా అంటే ప్రేక్షకుల ఊహకు మించిన అనుభూతి కలుగుతుంది. కెరీర్ ప్రారంభం నుంచి ఒక్కసారి కూడా ప్రేక్షకుల అంచనాలు అందుకోవడంలో ఆయన విఫలం కాలేదు. ఇక 'బాహుబలి'తో హాలీవుడ్ స్థాయి దర్శకుల జాబితాలో చేరిన ఆయన తన తదుపరి చిత్రం 'ఆర్ఆర్ఆర్'ను కూడా.. భారీ స్థాయిలోనే తెరకెక్కించారు. దీంతో ఈ మూవీపై భారీగా అంచనాలను ఏర్పడ్డాయి. ఇందులో ఇద్దరు టాలీవుడ్ స్టార్స్ నటించడం, ఫిక్షనల్ అండ్ పీరియాడిక్ సబ్జెక్ట్ కావడం వల్ల రాజమౌళి అద్భుతం చేయడం ఖాయమని సినీప్రియులు భావిస్తున్నారు. ఈ సినిమా బాక్సాఫీస్ వద్ద వసూళ్ల సునామీ సృష్టిస్తుందని ధీమా వ్యక్తం చేస్తున్నారు. కచ్చితంగా మూడు వేల కోట్లకు పైగా వసూలు చేస్తుందని ఈ సినిమాని చూసిన కలరిస్ట్ శివకుమార్ ట్వీట్ చేశారు. ఈయనతో పాటే మరి కొంతమంది కూడా సినిమా చరిత్ర తిరగరాయబోతుందని తమ అభిప్రాయాలను తెలిపారు.
RRR Collections Records: రూ.450కోట్ల బడ్జెట్తో తెరకెక్కిన ఈ సినిమా ఇప్పటికే రూ.1000కోట్ల ప్రీ రిలీజ్ బిజినెస్ కూడా చేసిందని ట్రేడ్ వర్గాలు చెబుతున్నాయి. మరి బాక్సాఫీస్ ఓపెనింగ్స్ ఎలా ఉండబోతున్నాయి? భారీ వసూళ్లను అందుకోవడానికి కలిసొచ్చే అంశాలేంటి? సినిమా ప్రత్యేకతలేంటి? వంటి విషయాలను ఓ సారి తెలుసుకుందాం..
- మొదటగా ఈ సినిమాను ప్రపంచం గర్వించదగ్గ దిగ్గజ దర్శకుడు రాజమౌళి తెరకెక్కించడం విశేషం. ఈ ఒక్క కారణంతోనే సినిమా చూసేందుకు దేశవ్యాప్తంగా అభిమానులు ఆసక్తి చూపుతారు.
- ఇప్పటికే జక్కన్న తెరకెక్కించిన 'బాహుబలి'తో తెలుగు సినిమా మార్కెట్ పరిధి కూడా పెరిగింది. ఆర్ఆర్ఆర్ సాంకేతికంగా ఉన్నత ప్రమాణాలతో తెరకెక్కించారు. ప్రముఖ హాలీవుడ్ టెక్నీషియన్స్ పనిచేశారు.
- ఇప్పటికే విడుదలైన పోస్టర్స్, సాంగ్స్, ట్రైలర్లో ఎన్టీఆర్, రామ్చరణ్ తమ లుక్స్, యాక్టింగ్తో ఆకట్టుకోవడం.
- బాలీవుడ్ స్టార్స్ అలియాభట్, అజయ్ దేవగణ్ ఈ సినిమాకు మరో ప్రత్యేక ఆకర్షణ. బీటౌన్లో వీరికి మంచి మార్కెట్ ఉంది. ఇటీవలే ఆలియా.. 'గంగూబాయ్' సినిమాతో తెలుగు ప్రేక్షకులను కూడా చేరువైంది. హాలీవుడ్ నటులు ఒలివియా మోరిస్‌, రే స్టీవ్‌సన్‌, అలిసన్‌ డూడీ కూడా ప్రత్యేక ఆకర్షణగా నిలవనున్నారు. వీరందరూ తెలుగు తెరకు ఈ చిత్రంతోనే పరిచయం కానున్నారు.
- తెలుగు రాష్ట్రాల్లో టికెట్ల రేట్లు పెంచుకోవడానికి ప్రభుత్వాలు అనుమతి ఇవ్వడం.
- ఐదో ఆటకు అనుమతి ఇవ్వడం సహా పదిరోజుల పాటు టికెట్‌ ధరలను పెంచుకునేలా రెండు రాష్ట్ర ప్రభుత్వాలు వెసులుబాటు కల్పించడం. దీని వల్ల ఓపెనింగ్స్ మంచి కలెక్షన్లను అందుకుంటుందని అంచనా.
- ఈ సినిమాలోని పాటలు శ్రోతలను బాగా అలరించాయి. 'జనని', 'నాటు నాటు' సహా తాజాగా విడుదలైన 'ఎత్తరజెండా' విపరీతంగా ఆకట్టుకున్నాయి. ముఖ్యంగా 'ఎత్తర జెండా'లో దాదాపు అన్ని రాష్ట్రాల స్వాతంత్ర్య సమరయోధుల పేర్లు ప్రస్తావించి అందరి దృష్టిని ఆకర్షించింది చిత్ర బృందం. కాబట్టి ఇది సినిమాకు మరింత బలం కానుంది.
- ఈ మధ్య కాలంలో నార్త్లో.. దక్షిణాది సినిమాల హవా విపరీతంగా పెరిగింది. మన సినిమాలను బాలీవుడ్తో పాటు మిగతా భాషల వారు బాగా ఆదరిస్తున్నారు. ఇటీవలే విడుదలైన 'పుష్ప' దీనికి నిదర్శనం.
- మొత్తంగా ఈ సినిమాకు ఇన్ని ప్లస్సులు ఉండటం వల్ల.. సినిమా విజయం సాధించి భారతీయ బాక్సాఫీస్ను షేక్ చేస్తుందని అంతా భావిస్తున్నారు.
బాహుబలి2 రికార్డ్స్ను కొట్టేస్తుందా?
ప్రభాస్ హీరోగా రానా దగ్గుపాటి విలన్గా.. రాజమౌళి దర్శకత్వంలో తెరకెక్కిన సినిమా బాహుబలి. బాక్సాఫీస్ వద్ద అప్పటివరకు ఉన్న రికార్డ్స్ను ఈ చిత్రం బ్రేక్ చేసింది. బాహుబలి-2 విడుదలైన మూడు రోజుల్లోనే రూ.500 కోట్లు వసూళ్లు చేసింది. మొదటి రోజే రూ.213 కోట్లు(గ్రాస్) రాబట్టింది. 2017లో విడుదలైన ఈ సినిమా బాక్స్ ఆఫీస్ రికార్డులు.. ఇప్పటికీ చెక్కుచెదరకుండా ఉన్నాయి. వీటిని బద్దలు కొట్టడం ఆర్ఆర్ఆర్తోనే సాధ్యమవుతుందని సినీ ప్రియులు చెప్పుకుంటున్నారు. ఆన్లైన్లో విడుదలైన టికెట్లు.. హాట్ కేకుల్లా అమ్ముడవుతున్నాయి. ఇలాంటి పరిస్థితుల్లో ఆర్ఆర్ఆర్.. సరికొత్త బెంచ్మార్క్ క్రియేట్ చేయడం ఖాయమని సినీ వర్గాలు చెబుతున్నాయి.
ఇదీ చదవండి: 'పాన్‌ ఇండియా'.. రాజమౌళి వల్లే సాధ్యమైంది: ఆమిర్‌ ఖాన్‌
