ప్రేమ గొప్పదైతే.. చరిత్రలో, సమాధుల్లో ఉండాలి గానీ.. పెళ్లి చేసుకొని, పిల్లల్ని కని ఇంట్లో తిరుగుతుంటే ఎలా? ప్రేమ ఎప్పుడూ చరిత్రే... దానికి భవిష్యత్తు లేదు.
... ఇటీవల విడుదలైన 'ఉప్పెన' చిత్రంలోని మాటలు.
ప్రేమ చాలా గొప్పది.
చరిత్ర, వర్తమానం, భవిష్యత్తు కాలాల్లోనూ ఉంటుందది. దాన్ని ద్వేషించే వారిని ఎందరినో మట్టిలో కలిపేసింది. అది ఎప్పుడూ ఒంటరిగా ఉండదు... జంటగానే తిరుగుతుంటుంది. ప్రేమ అనే పునాది పైనే ఎంతో మంది భవిష్యత్తు నిర్మించుకుంటున్నారు. దానికి గమనమే కానీ... మరణమే లేదు.
... ఈ తరం యువత ప్రతిస్పందన ఇది.
ప్రేమంటే ఒకరి కోసం ఒకరు చావడం కాదు... ఒక్కటిగా జీవించడం. అందుకే ప్రేమ కావ్యాల్లో నిండిపోయి.. కథల్లో ఒదిగిపోయి... కవితల్లో ఇమిడిపోయి... నేటి తరం కోసం సినిమా పాటల్లో, మాటల్లో చిగురిస్తోంది. ప్రేమికుల హృదయాల్లో ముంచిన కలాలతో మన రచయితలు వీటికి ప్రాణం పోశారు. ఇటీవల కొన్ని సినిమాల్లోని ప్రేమ పాటలు... యూట్యూబ్‌లో కోట్ల మంది హృదయ స్పందనలై వికసిస్తున్నాయి.
ప్రేమ ఎంత అందమైందంటే... నువ్వు ఎక్కడుంటే అక్కడే స్వర్గాన్ని నేలకు దించుతుంది. అందుకే...
"ఒకే ఒక లోకం నువ్వే.. లోకంలోనే అందం నువ్వే.. అందానికే హృదయం నువ్వే.. నాకే అందావే" అంటూ 'శశి' లాంటి ప్రేమికుల మనసుల్లో వర్షమై కురుస్తుంది.
ప్రేమ దారులను పూల వనాలుగా మారుస్తుంది. అందుకే....
'నువ్వు నడిచేటి తీరుకే తారలు మొలిచాయి నేలకే... నువ్వు వదిలేటి శ్వాసకే గాలులు బతికాయి చూడవే' అంటారు చంద్రబోస్‌ '30రోజుల్లో ప్రేమించడం ఎలా'గో చెబుతూ!
ప్రేమ ఎంతటి కష్టాల్ని అయినా జయించి తీరం చేరుతుంది. అందుకే..!
'నీ కన్ను నీలి సముద్రం.. నా మనసు అందుట్లో పడవ ప్రయాణం.. నీ నవ్వు ముత్యాల హారం నన్ను తీరానికి లాగేటి దారం.. దారం' అంటారు రచయిత శ్రీమణి 'ఉప్పెనంత' ప్రేమను చూపుతూ!
ప్రేమ ఊహలకు ఊపిరిపోస్తుంది. అందుకే...
'ఎగరేసి ఊహల్నే.. చెరిపేసి హద్దుల్నే... దాటేద్దాం దిక్కుల్నే.. చూసేద్దాం చుక్కల్నే’ అని సరిహద్దుల్లేని ప్రేమను ఆవిష్కరిస్తారు చైతన్యప్రసాద్‌ 'టక్‌ జగదీష్‌' కోసం!
ప్రేమ గుండెకు పండగ తెస్తుంది. కళ్లకు కళ ఇస్తుంది. అందుకే...
'గుచ్చే గులాబిలాగా.. వెలుగిచ్చే మతాబులాగా.. కళా తెచ్చే కల్లాపిలాగే... నచ్చావులే భలేగా’ అని ప్రేమాక్షరాలు లిఖించారు అనంత్‌శ్రీరామ్‌ 'మోస్ట్‌ ఎలిజిబుల్‌ బ్యాచ్‌లర్‌'లా.
ప్రేమ.. మనసుల్లో సూర్యోదయం. అది వెలుగులై విరబూస్తుంది. అందుకే...
'వచ్చేశావే... లైనులోకి వచ్చేశావే.. చిమ్మ చీకటికున్న జిందగిలోన ఫ్లడ్‌లైట్‌ వేశావే..' అంటూ 'జాతిరత్నాలు' కోసం ప్రేమ ముత్యాలు జల్లారు రామజోగయ్య శాస్త్రి.
ప్రేమ ఎప్పుడూ చూడని లోకాన్ని పరిచయం చేస్తుంది. ఎన్నడూ వినని భావనలను పుష్పిస్తుంది.
'...అందుకే.. ఈ నేల నవ్వి పూలు పూసెనే.. గాలులన్నీ నిన్ను తాకి గంధమాయెనే! ఏ కన్ను చూడని చిత్రమే... చూస్తున్నది నేడు నా ప్రాణమే!’ అంటూ రెహమాన్‌ 'అర్ధశతాబ్దం' కోసం కలాన్ని కదిపారు.
...ఇలా ప్రేమలోని గాఢతంతా... ప్రేమికుల రోజున వాట్సప్‌ స్టేటస్‌లో కళకళలాడుతుంది. ఫేస్‌బుక్‌ పేజీల్లో తళతళ మెరుస్తుంది. ఇన్‌స్టాగ్రామ్‌ల్లో గలగల నవ్వేస్తుంది.
