"నా చేష్టలు.. విచిత్రమైన వైఖరి.. విభిన్నమైన అలవాట్లు నిన్న మొన్న పుట్టినవి కావు’' అంటున్నాడు బాలీవుడ్ స్టార్‌ హీరో రణ్వీర్ సింగ్. ఈ యువ హీరో పేరు చెప్పగానే యువతరంలో ఓ తెలియని పూనకం మొదలైపోతుంది. వైవిధ్యమైన వస్త్రధారణ, చలాకీతనానికి చిరునామాగా నిలిచే అతడి మాటలు అందరి దృష్టినీ ఆకర్షిస్తుంటాయి. అంతేకాదు ఈ లక్షణాలే రణ్వీర్ను కుర్రకారుకు మరింత దగ్గర చేశాయి.
బహిరంగ వేదికలపై ఎంతో ఎనర్జిటిక్గా కనిపించే రణ్వీర్ నిజ జీవితంలో ఎలా ఉంటాడు?. ఈ విషయం తెలుసుకోవాలనే ఆసక్తి అతడి అభిమానులతో పాటు సినీప్రియుల్లోనూ కనిపిస్తుంటుంది. తాజాగా దీనిపై ఓ ఇంటర్వ్యూలో వివరణ ఇచ్చాడు రణ్వీర్.
"ప్రజల ముందు నేనెప్పుడూ నా నిజస్వభావాన్నే ప్రదర్శిస్తుంటా. నాది ఓ విభిన్నమైన మనస్తత్వం అని చిన్నప్పటి నుంచే తెలుసు. దాన్ని నేనెప్పుడూ దాచి పెట్టే ప్రయత్నం చేయలేదు. చాలా మంది నేను అందరిలా ప్రవర్తించనని అంటుంటారు. కానీ, నా వ్యవహార శైలి చిన్నప్పటి నుంచి అలాగే ఉంది. దాన్ని మార్చుకోవడం ఇష్టం ఉండదు. వేరే వారిలాగా మారడాన్ని ఎప్పుడూ ఇష్టపడను. నన్ను నాలా.. చూసేవాళ్లు కేవలం నా బాల్య మిత్రులు, కుటుంబ సభ్యులు మాత్రమే".
-రణ్వీర్ సింగ్, బాలీవుడ్ హీరో
'నా ఈ విచిత్రమైన చేష్టలు.. వైవిధ్యమైన వైఖరి నిన్నమొన్న పుట్టుకొచ్చినవి కావు.. నా వస్త్రధారణా మొదటి నుంచి ఇలా విభిన్నంగానే ఉంది' అని చెబుతున్నాడు రణ్వీర్. మూడో తరగతిలోనే మోహాక్‌ హెయిర్‌ స్టైల్ ట్రై చేసిన ఈ హీరో ఆ ఫొటోను ఇటీవల సోషల్‌ మీడియాలోనూ షేర్‌ చేశాడు. అలాంటి చిత్రాలు నా దగ్గర బోలెడున్నాయని అంటున్నాడీ హీరో. 'ఇదంతా ప్రచారం కోసం, అందరి దృష్టినీ ఆకర్షించాలని చేస్తున్న పనులైతే కావని.. తన వ్యక్తిత్వంపై వచ్చే విమర్శలను ఎప్పుడూ పట్టించుకోనని' తెలిపాడు.
ఇవీ చూడండి.. ఒక్క పాట కోసం ముగ్గురు కామ్రేడ్స్
