మునుపటిలా వీకెండ్స్, మల్టీప్లెక్స్లు, షాపింగ్లు లేవు. కరోనా మహమ్మారి దెబ్బకు అన్నీ బంద్ అయిపోయాయి. వినోదం కోసం ఓటీటీలకే పరిమితమవ్వాల్సిన పరిస్థితి ఏర్పడింది. ఇలా ఇంకెంత కాలం? డీటీఎస్ ఎఫెక్టులు, త్రీడీ చిత్రాల కోసం కుటుంబంతో కలిసి హాయిగా థియేటర్లకు వెళ్లే రోజులు మళ్లీ వస్తాయా? ఒకవేళ మల్టీప్లెక్స్లు ఓపెన్ చేస్తే.. గతంలోలాగే ప్రజలు ఆదరణ చూపిస్తారా? సినిమా కోసం వెళ్తే వైరస్ ఎక్కడ అంటుకుంటుందో అని భయాలున్నాయా? అయితే వాటన్నింటికి సమాధానాలు ఇచ్చింది మల్టీప్లెక్స్ అసోసియేషన్ ఆఫ్ ఇండియా.
ఆగస్టు నుంచే!
దేశంలో కరోనా వ్యాప్తి ఎక్కువగా ఉన్న నేపథ్యంలో మార్చి నుంచి థియేటర్లు మూసేశారు. ఆనెల 25న లాక్డౌన్ విధించిన ప్రభుత్వం.. నెలల వ్యవధి తర్వాత పలు వ్యాపారాలు, సర్వీసులకు నెమ్మదిగా ఫేజ్ల రూపంలో అనుమతులు ఇస్తోంది.
జూన్ 8 నుంచి షాపింగ్ మాల్స్ తెరవడానికి ఒప్పుకున్న చెప్పిన కేంద్రం.. వాటిల్లో ఉండే సినిమా హాళ్లు, గేమింగ్ ఆర్కేడ్లు, ఆట ప్రదేశాలకు మాత్రం అనుమతి ఇవ్వలేదు. మహమ్మారి కారణంగా థియేటర్లు, మల్టీప్లెక్స్లు మూత పడటం వల్ల సినీ పరిశ్రమ భారీ నష్టాలను ఎదుర్కొంటోందని అభిప్రాయపడింది మల్టీప్లెక్స్ అసోసియేషన్ ఆఫ్ ఇండియా. అన్లాక్-3 ప్రక్రియలో భాగంగా కనీసం ఆగస్టు నుంచి అయినా మల్టీప్లెక్స్లు ఓపెన్ చేస్తే.. కచ్చితంగా వీక్షకులు వస్తారని ఆశాభావం వ్యక్తం చేసింది.
మల్టీప్లెక్స్ సర్వీసులు పునరుద్ధరిస్తే తీసుకునే జాగ్రత్తలు, పాటించే నిబంధనలతో కొన్ని విధివిధానాలనూ రూపొందించింది మల్టీప్లెక్స్ అసోసియేషన్ ఆఫ్ ఇండియా(మాయ్). అవేంటంటే..?
- మల్టీప్లెక్స్ల్లో ఏ రెండు స్క్రీన్లలోని షోలు ఒకేసారి మొదలుకావు. అందుకు తగ్గట్టుగానే షెడ్యూల్ను రూపొందిస్తారు. సినిమా సినిమాకు మధ్య 15 నిమిషాల నుంచి గంటన్నర వ్యవధి ఉండేలా చూడనున్నారు.
- షో మధ్య ఖాళీ సమయాన్ని పెంచనున్నారు. ఆ సమయంలో థియేటర్ను శానిటైజ్ చేస్తారు.
- టికెట్ బుక్ కాగానే ప్రత్యేకమైన ఆల్గారిథమ్ సాయంతో ఆ సీటుకు ఇరువైపులా ఉండే సీట్లు బుకింగ్ చేసుకోవడానికి వీలు లేకుండా అయిపోతుంది. ఇది భౌతిక దూరాన్ని పక్కాగా పాటించేందుకు ఉపయోగపడుతుంది.
- లాబీ ఏరియా సహా ప్రజలు ఎక్కువగా ముట్టుకునే రెయిలింగ్లు, డోర్లను ఎప్పటికప్పుడు శుభ్రం చేస్తారు. ఆడియన్స్ శరీర ఉష్ణోగ్రతను చెక్ చేయడం, తప్పనిసరిగా మాస్క్ ధరించాలని నిబంధనలు పెట్టనున్నారు.
స్కాన్ క్యూఆర్ కోడ్
థియేటర్లు, మల్టీప్లెక్స్లలో ఇకపై పేపర్ టికెట్లు కనిపించకపోవచ్చు. ఆన్లైన్ టికెట్ బుకింగ్ సమయంలో ఆల్-ఇన్-వన్ ఎస్ఎంఎస్ సిస్టమ్ ద్వారా కస్టమర్లకు బార్కోడ్ లింక్ను మొబైల్ ఫోన్లకు సందేశం రూపంలో పంపుతారు. ఎంట్రన్స్ వద్ద ఆ క్యూఆర్ కోడ్ను స్కాన్ చేయాల్సి ఉంటుంది. సీటు లొకేషన్, ఫుడ్ అండ్ బేవరేజ్ మెనూ ఆర్డర్ కూడా డిజిటల్గానే చేసుకోవచ్చు.
మెట్రో ప్రాంతాల్లో ఇప్పటికే 80 శాతం టికెట్లు ఆన్లైన్లో బుక్ అవుతున్నాయి. నాన్ మెట్రో సిటీల్లో మాత్రం 40 నుంచి 50 శాతం మాత్రమే అంతర్జాలం సాయంతో టికెట్లు కొంటున్నారు. సగటున 50 శాతం మంది మల్టీప్లెక్స్ బయట ఉండే బాక్సాఫీస్ వద్దే టికెట్లు బుక్ చేసుకుంటున్నారు. కాబట్టి బాక్సాఫీస్ను కూడా పేపర్లెస్ చేసేందుకు ఏర్పాట్లు చేస్తున్నాయి యాజమాన్యాలు.
ఏవైనా సలహాలు, సూచనలు కోసం టచ్ స్క్రీన్ శానిటైజ్డ్ మెషీన్లను ఇన్స్టాల్ చేయనున్నారు. వీటి వల్ల సిబ్బంది మీద ఆధారపడటం తగ్గుతుంది.
12 వేల కోట్ల వ్యాపారం
తెలుగు, హిందీ, తమిళంలో పెద్ద హీరోల చిత్రాలు విడుదలైతే ప్రేక్షకులు కచ్చితంగా వస్తారని మల్టీప్లెక్స్ యాజమాన్యాలు భావిస్తున్నాయి. సూర్యవంశీ, రాధే, 83 వంటి చిత్రాలు కచ్చితంగా భారీ వసూళ్లు సాధిస్తాయని అభిప్రాయపడుతున్నాయి. ప్రస్తుతం ఓటీటీలకు కొంతమంది మొగ్గుచూపినా.. థియేటర్లలో సినిమా చూడటం మన డీఎన్ఏలో ఉందని చెప్పుకొచ్చారు. ఎందుకంటే అది సోషల్ ఎక్స్పీరియన్స్ అంటున్నారు. సినిమా థియేటర్ల వల్ల ప్రతి ఏడాది దాదాపు 12 వేల కోట్ల వ్యాపారం జరుగుతుందని.. ప్రస్తుతం నెలకు వందకోట్ల రూపాయల మేర నష్టాలు ఎదుర్కొంటున్నట్లు స్ఫష్టం చేశారు మల్టీఫ్లెక్స్ నిర్వహకులు.
80 శాతం తెరుస్తాం
ఒక్కసారి మల్టీప్లెక్స్ ఓపెన్ చేసుకునేందుకు అనుమతి ఇస్తే.. దాదాపు 80 శాతం స్క్రీన్లు రన్ చేసేందుకు సిద్ధంగా ఉన్నట్లు మల్టీప్లెక్స్ అసోసియేషన్ ఆఫ్ ఇండియా తెలిపింది. ఈ మేరకు కేంద్ర హోంశాఖ, సమాచార ప్రసార మంత్రిత్వ శాఖ, వైద్య ఆరోగ్య శాఖ, నీతి ఆయోగ్కు.. తమ విధివిధానాలతో కూడిన లేఖను జులై 9న అందించినట్లు చెప్పారు సంఘం ప్రతినిధులు. ఆ తర్వాతి రోజునే ప్రధాని కార్యాలయం సహా ఆర్థిక మంత్రిత్వశాఖ, ఐటీ శాఖకు కూడా ఆ లేఖ పంపినట్లు తెలిపారు. అయితే ప్రభుత్వం దీనిపై తుది నిర్ణయం తీసుకోవాల్సి ఉంది.
