కన్నడ చిత్ర పరిశ్రమలో డ్రగ్స్ దందా విషయమై మాట్లాడాడు ప్రముఖ నటుడు సుదీప్. ఇది తనకు అసలు తెలియదని అన్నారు. ఇలాంటి పనులతో ఇండస్ట్రీకి చెడ్డపేరు తీసుకురావద్దని విజ్ఞప్తి చేశారు. డ్రగ్స్ రాకెట్ కేసులో శాండల్వుడ్కు చెందిన ముగ్గురు వ్యక్తుల్ని ఇటీవలే అరెస్ట్ చేశారు నార్కోటిక్స్ కంట్రోల్ బ్యూరో.
"నాకు తెలిసిందే చెబుతాను. నేను కూడా ఇండస్ట్రీకి చెందినవాడినే. డ్రగ్ రాకెట్ గురించి నాకు అసలు తెలియదు. ఎక్కువ మంది స్నేహితులు లేని కారణంగా అలాంటి వాటి గురించి నాకు అవగాహన లేదు" - సుదీప్, కన్నడ సూపర్స్టార్
డ్రగ్స్ ప్రభావంతో రాష్ట్రంలోని యువత చెడిపోతున్నారని, పలు రంగాలు డ్రగ్స్ మాఫియా గుప్పిట్లో ఉన్నాయని ముఖ్యమంత్రి యడియూరప్పకు మెమోరాండంను సమర్పించారు సినీనటి, బీజేపీ నాయకురాలు అనురాధ. మరణశిక్ష లాంటి కఠిన చట్టాలు మాత్రమే ఈ సమస్యకు పరిష్కారమని ఆమె పేర్కొన్నారు.
దీనిని పరిగణలోకి తీసుకున్న కేంద్ర నేరపరిశోధన సంస్థ, దర్యాప్తు చేపట్టింది. సినీప్రముఖుడు ఇంద్రిజిత్ లంకేశ్కు సోమవారం సమన్లు జారీ చేసింది. విచారణకు హాజరైన లంకేశ్ను అధికారులు దాదాపు ఐదు గంటలపాటు ప్రశ్నించగా.. చిత్రపరిశ్రమలో ఎంతోమంది డ్రగ్స్ బారిన పడ్డారని తెలిపారు. కన్నడ చిత్రపరిశ్రమకు చెందిన 15 మంది ఈ రాకెట్లో ఉన్నారని వెల్లడించారు.
