రెబల్ స్టార్ ప్రభాస్, బాలీవుడ్ హీరోయిన్ దీపికా పదుకొణె కలిసి తొలిసారి తెర పంచుకోనున్నారు. ఇటీవలే చిత్రబృందం ఇందుకు సంబంధించిన ప్రకటన కూడా విడుదల చేసింది. దీంతో వారంతంలో సామాజిక మాధ్యమాల టైమ్లైన్స్లో ఈ వార్త హాట్టాపిక్గా మారింది. ఈ క్రమంలోనే మరిన్ని బాలీవుడ్ సినిమాలు ప్రేక్షకులను పలకరించేందుకు సిద్ధమవుతున్నాయి. 2021లో 'ఫోన్ భూత్' అనే హారర్ చిత్రం కూడా థియేటర్లలో భయపెట్టేందుకు రెడీ అవుతోంది. ఇందులో కత్రినా కైఫ్, సిద్ధాంత్ చతుర్వేది, ఇషాన్ ఖత్తర్ కీలక పాత్రలు పోషిస్తున్నారు. ఇక అక్షయ్ కుమార్, ధనుష్ , సారా అలీఖాన్ త్రయంలో రానున్న చిత్రం 'అత్రాంగి రే'. ఆనంద్ ఎల్ రాయ్ ఈ సినిమాకు దర్శకుడు. వీరంతా తొలిసారి కలిసి నటించనున్నారు. ఈ క్రమంలోనే త్వరలో మొదటి సారి ఆన్ స్క్రీన్పై.. ప్రేక్షకులను అలరించేందుకు సిద్ధమవుతున్న బాలీవుడ్ అగ్ర నటుల సినిమాలపై ఓ లుక్కేద్దాం రండి.
నాగ్ అశ్విన్ దర్శకత్వంలో రెబల్ స్టార్ ప్రభాస్, దీపికా పదుకొణె తొలిసారి జంటగా కనువిందు చేయనున్నారు. ఈ సినిమా టైటిల్, కథాంశం గురించి అధికారికంగా ఎటువంటి సమాచారం వెలువడలేదు. వైజయంతి మూవీస్ నిర్మిస్తున్న ఈ చిత్రాన్ని హిందీ, తమిళ, తెలుగు భాషల్లో విడుదల చేయనున్నారు.
- " class="align-text-top noRightClick twitterSection" data="
">
బాలీవుడ్లో ఇప్పటివరకు వచ్చిన హారర్ చిత్రాలు అంతగా ప్రేక్షకులను ఆకట్టుకోలేకపోయాయి. అయితే, ఈసారి తాను భయపెడతానంటూ దర్శకుడు గుర్మీత్ సింగ్ 'ఫోన్ భూత్' తెరకెక్కిస్తున్నాడు. కత్రినా కైఫ్, సిద్ధాంత్ చతుర్వేది, ఇషాన్ ఖత్తర్ ప్రధాన పాత్రల్లో నటించనున్నారు. 2021లో ఈ మూవీ విడుదల కానుంది.
చంద్ర ప్రకాశ్ ద్వివేది దర్శకత్వంలో రానున్న యాక్షన్ డ్రామా చిత్రం 'పృథ్వీరాజ్'. మాజీ మిస్ వరల్డ్ మానుషి చిల్లర్, అక్షయ్ కుమార్ జంటగా ఇందులో నటించనున్నారు. మహారాజ పృథ్వీరాజ్ చౌహాన్ నిజ జీవిత కథ ఆధారంగా ఈ సినిమా రూపొందించనున్నారు. ఈ ఏడాది దీపావళికి విడుదల కావాల్సి ఉండగా.. కరోనా కారణంగా వాయిదా పడింది.
'లవ్ సోనియా', 'సూపర్ 30', 'బత్లా హౌస్' వంటి వరుస విజయాల తర్వాత .. మృణాల్ ఠాకూర్ 'జెర్సీ' చిత్రంలో నటించనుంది. ఇందులో షాహిద్ కపూర్ సరసన కనిపించనుందీ భామ. తెలుగులో దర్శకత్వం వహించిన గౌతమ్ తిన్ననూరి.. హిందీలోనూ తెరకెక్కించనున్నాడు.
ఫర్హాన్ అక్తర్ సినిమా 'తుఫాన్'లోనూ ఛాన్స్ కొట్టేసింది మృణాల్ ఠాకూర్. స్పోర్ట్స్ డ్రామా నేపథ్యంలో ఈ చిత్రం రూపొందిస్తున్నారు. ఈ ఏడాది సెప్టెంబరులో విడుదల కావాల్సి ఉండగా.. ప్రస్తుత పరిస్థితుల కారణంగా వాయిదా పడింది.
ఈ ఏడాది ప్రారంభంలో సారా అలీ ఖాన్, అక్షయ్ కుమార్, ధనుష్ త్రయంలో 'అత్రాంగి రే' అనే సినిమా ప్రకటించారు. ఆనంద్ ఎల్ రాయ్ దర్శకత్వం వహించనున్నాడు. ఏఆర్ రెహ్మాన్ స్వరకర్త. ఈ సినిమా 2021లో విడుదల చేయనున్నట్లు చిత్రబృందం తెలిపింది.
'అర్జున్ రెడ్డి' సినిమాలో ప్రీతిగా కనిపించి తెలుగు ప్రేక్షకుల దృష్టిని ఆకర్షించిన షాలినీ పాండే.. ఇప్పుడు బాలీవుడ్లో అడుగుపెట్టింది. యశ్రాజ్ ఫిలింస్ తెరకెక్కిస్తున్న 'జయేశ్ భాయ్ జోర్దార్'లో రణ్వీర్ సింగ్ సరసన ఛాన్స్ కొట్టేసింది. ఈ సినిమా ఈ ఏడాది అక్టోబరులో విడుదల కావాల్సి ఉంది.
బాలీవుడ్లో సూపర్హిట్గా నిలిచిన 'దోస్తానా' సినిమా సీక్వెల్ కోసం ప్రేక్షకులు ఆసక్తిగా ఎదురు చూస్తున్నారు. ఈ చిత్రంలో కార్తీక్ ఆర్యన్, జాన్వీ కపూర్ జంటగా నటించారు. కరోనా కారణంగా ఈ ఏడాదిలో సినిమా విడుదలపై అనిశ్చితి నెలకొంది.
సినీ ప్రేక్షకులు ఎంతగానో ఎదురు చూస్తున్న మరో సీక్వెల్ 'భూల్ భులైయా'. కార్తీక్ ఆర్యన్, కియారా అడ్వాణీ హీరో హీరోయిన్లు. 2020 జులైలో థియేటర్లలో సందడి చేయాల్సిన ఈ సినిమా.. కరోనా కారణంగా వాయిదా పడింది
బాలీవుడ్లో సీక్వెల్గా తెరకెక్కనున్న మరో సినిమా 'బంటీ ఔర్ బబ్లీ 2'. సిద్ధాంత్ చతుర్వేది, షార్వారీ వాగ్ ప్రధాన పాత్రల్లో నటించనున్నారు. ఇందులో సైఫ్ అలీఖాన్, రాణి ముఖర్జీ కీలక పాత్రల్లో కనిపించనున్నారు. పరుణ్ వి. శర్మ దర్శకుడు.
బాలీవుడ్లో ప్రతిష్టాత్మకంగా రూపొందిస్తున్న చిత్రం 'బ్రహ్మాస్త్ర'. ఇందులో ప్రేమజంట ఆలియా భట్, రణబీర్ కపూర్లు కలిసి కనువిందు చేసేందుకు సిద్ధమయ్యారు. అయాన్ ముఖర్జీ దర్శకత్వం వహిస్తుండగా.. కరణ్ జోహర్ నిర్మిస్తున్నారు. ఇందులో అమితాబ్ బచ్చన్, మౌని రాయ్, కింగ్ నాగార్జున కీలక పాత్రల్లో నటించనున్నారు. ఈ ఏడాది డిసెంబరులో సినిమాను విడుదల చేయాలని చిత్రబృందం భావిస్తోంది.
వరుణ్ ధావన్, సారా అలీఖాన్ జంటగా నటిస్తున్న చిత్రం 'కూలీ నెంబర్.1'. 1995లో గోవింద, కరీష్మా కపూర్ కలయికలో వచ్చిన సినిమాకు రీమేక్గా అదే పేరుతో తెరకెక్కనుంది.
ఈ ఏడాది ఆన్ స్క్రీన్పై 'రూహి అఫ్జానా' చిత్రంతో కనువిందు చేసేందుకు రెడీ అవుతున్న జంట రాజ్కుమార్ రావ్, జాన్వీ కపూర్.
'గుడ్ న్యూస్' సినిమాతో ఎంతగానో ఆకట్టుకున్న అక్షయ్ కుమార్, కియారా అడ్వాణీ జోడీ.. 'లక్ష్మీబాంబ్'తో మరోసారి ప్రేక్షకుల ముందుకు రానుంది. తమిళ చిత్రం 'కాంచన'కు ఇది రీమేక్. డిస్నీ ప్లస్ హాట్స్టార్ ప్లాట్ఫామ్లో త్వరలో విడుదలకానుంది.
అనన్యా పాండే, ఇషాన్ ఖత్తర్ జోడీగా థ్రిల్లర్ నేపథ్యంలో రానున్న సినిమా 'కాలీ పీలీ'. 2018లో తెలుగులో వచ్చిన 'టాక్సీవాలా'కు ఇది రీమేక్.
