'వైదిస్ కొలవెరీ దీ' అంటూ దేశాన్ని ఊపేసిన ధనుష్.. తమిళంలో ఎన్నో హిట్లు అందుకున్నాడు. బాలీవుడ్లోనూ రాంఝానా సినిమాతో అదరగొట్టాడు. హాలీవుడ్లోనూ తన మార్క్ను చూపించేందుకు సిద్ధమయ్యాడు. అతడు హీరోగా నటించిన 'ద ఎక్స్ట్రార్డినరీ జర్నీ ఆఫ్ ఫకీర్' జూన్ 21న విడుదల కానుంది. ఈ సందర్భంగా హాలీవుడ్ సినిమా చిత్రీకరణలో తన అనుభవాలను, అభిప్రాయాలను ఈటీవీ భారత్ ప్రత్యేక ఇంటర్వ్యూలో పంచుకున్నాడు ధనుష్.
ద ఎక్స్ట్రార్డినరీ జర్నీ ఆఫ్ ఫకీర్ సినిమాలోని తన పాత్రకు 100శాతం న్యాయం చేశానని ధనుష్ చెప్పాడు. ఏ భాషలో నటించామని కాదని, పాత్రకు ఎంత న్యాయం చేశామన్నదే ముఖ్యమని అన్నాడు.
"తమిళం, హిందీ, ఇంగ్లిషు... ఏ భాషలో నటించినా అన్నీ నాకు ఒకటే. నా పని నేను చేస్తా. నేను అన్నీ ఒకటేనని భావిస్తా. పాత్రకు న్యాయం చేయడమే నాకు ముఖ్యం. నేను ఆ పని చేశానని అనుకుంటున్నా."
- ధనుష్, హీరో
ప్రపంచంలోని వివిధ ప్రాంతాల నుంచి వచ్చిన నటులు, సాంకేతిక నిపుణులతో పని చేయడం వల్ల చాలా విషయాలు, అంశాలు నేర్చుకునే అవకాశం కలిగిందని చెప్పాడు ధనుష్.
"చాలా ప్రయాణాలు చేశాం. ప్రపంచ నలుమూలల నుంచి వచ్చిన సినీ పరిశ్రమల వారిని, నటులను కలిశాం. చాలా అంశాలు నేర్చుకునే అవకాశం కలిగింది. నటులు, సాంకేతిక నిపుణుల నుంచి కొత్త విషయాలను నేర్చుకుంటూ చాలా ఎంజాయ్ చేశాం." - ధనుష్, హీరో
తన సరసన హాలీవుడ్ చిత్రంలో నటించిన హీరోయిన్ బెర్నీస్ బెజో అద్భుత నటి అంటూ ప్రశంసించాడు ధనుష్.
"ఆమె చాలా మంచివారు. చాలా సహకరించారు. తన పాత్రను ఎంతో సునాయాసంగా చేశారు. ఆమెతో నటించడం వల్ల చాలా విషయాలు నేర్చుకున్నా." - ధనుష్, హీరో
తనతో రాంఝనాను తెరకెక్కించిన బాలీవుడ్ దర్శకుడు ఆనంద్ ఎల్ రాయ్తో మరో సినిమాను త్వరలో చేయనున్నట్టు ధ్రువీకరించాడు ధనుష్.
"ఇది నిజమే. త్వరలో ఆనంద్ రాయ్తో సినిమా చేయబోతున్నా. ఎప్పుడు, ఎలా అనే విషయాలు ఇంకా అనుకోలేదు." - ధనుష్, హీరో
