ప్రస్తుతం సమస్త ప్రపంచాన్ని ఏకం చేసేది ఏదైనా ఉందంటే అది అంతర్జాలమే. భూగోళంపై ఏ మూలన ఏం జరుగుతుందో ఇట్టే మన మునివేళ్లతో తెలుసుకోవచ్చు. రోజువారీ పనుల్లో భాగంగా మనం ఎన్నో సైట్లు, యాప్లను సందర్శిస్తాం. ఇలా ప్రతిసారీ మన యూజర్ యాక్టివిటీ సర్వర్లలో రికార్డ్ అవుతుంది. ఈ ట్రాకింగ్ ప్రతిసారీ ప్రమాదకరం కాకపోవచ్చు, కానీ మన ప్రైవసీకి మాత్రం ఇది భంగం కలిగించేదే.
యూజర్ల ఇంటర్నెట్ యాక్టివిటీని ట్రాక్ చేయడానికి అనేక కారణాలు ఉంటాయి. అడ్వర్టైజ్మెంట్స్ ఇందులో ప్రధానమైనది. యూజర్ల అభిరుచికి తగ్గట్లు ప్రకటనలు కనిపించేలా చేసేందుకు బ్రౌజర్ యాక్టివిటీ ఉపయోగపడుతుంది. మన బ్రౌజింగ్ అలవాట్లను గుర్తించి సరిపోలిన సమాచారాన్ని మనకు ఈ నెట్వర్క్లు అందిస్తాయి. మీరెప్పుడైనా గ్రహించే ఉంటారు.. ఆన్లైన్లో ఓ ప్రొడక్ట్ను మీరు సర్చ్ చేస్తే.. తర్వాత ఏ వెబ్సైట్కు వెళ్లినా మీకు అవే యాడ్లు కనిపిస్తాయి. ఇలాంటివి జరగకుండా ఉంచడం సహా మన బ్రౌజింగ్ వివరాలను గోప్యంగా ఉంచేందుకు ఉపయోగించేదే వీపీఎన్(VPN).
వీపీఎన్ ఏంచేస్తుంది?
వీపీఎన్ అంటే వర్చువల్ ప్రైవేట్ నెట్వర్క్(Virtual Private Network). ఇది యూజర్లకు, ఇంటర్నెట్కు మధ్య సురక్షితమైన కనెక్షన్ అందిస్తుంది. వీపీఎన్ ద్వారా మనం సెకండరీ నెట్వర్క్కు కనెక్ట్ అవుతాం. బ్రాడ్బ్యాండ్లో మన ఇంటర్నెట్ యాక్టివిటీని వీపీఎన్ నెట్వర్క్ పూర్తిగా అడ్డుకుంటుంది. ఇతర సైట్లు, నెట్వర్క్లు మన బ్రౌజింగ్ యాక్టివిటీని చూడకుండా చేస్తుంది. రిమోట్ వర్కింగ్ కోసం వీపీఎన్ను సంస్థలు ఉపయోగిస్తుంటాయి. పనికి సంబంధించిన సమాచారాన్ని, ఫైళ్లను ఎక్కడి నుంచైనా యాక్సెస్ చేసే వీలు దీని ద్వారా కలుగుతుంది.
వీపీఎన్ కనెక్షన్ ఎలా పనిచేస్తుంది?
వీపీఎన్ నెట్వర్క్ ఒక రకమైన భద్రతను అందిస్తుంది. ఇంటర్నెట్ యాక్టివిటీని ఎవరో ట్రాక్ చేస్తున్నారనే భయాన్ని దూరం చేస్తుంది. ఇది ఫోన్ను ప్రైవేట్ సర్వర్లకు కనెక్ట్ చేస్తుంది. తద్వారా యూజర్ల ఐపీ అడ్రెస్ ఇతర నెట్వర్క్లకు కనిపించదు. డివైజ్ నుంచి వెళ్లే సమాచారాన్ని ఎన్క్రిప్ట్ చేస్తుంది. ఏ నెట్వర్క్, సైట్ వీటిని గుర్తించలేవు.
వీపీఎన్ రూటర్ ఎంపిక చేసుకోవడం...
వీపీఎన్ వల్ల చాలా లాభాలు ఉన్నప్పటికీ.. వీటిని తప్పుడు అవసరాలకు ఉపయోగించేవారూ ఉన్నారు. నిబంధనలకు వ్యతిరేకంగా ఏదైనా పనిచేస్తే వారిని గుర్తించడమూ కష్టమవుతుంది. అందువల్లే మార్కెట్లో వీపీఎన్ రూటర్లు సులభంగా లభించవు. అయితే, వీపీఎన్ క్లైంట్, క్లైంట్ మోడ్కు సహకరించే వీపీఎన్ హోమ్ రూటర్లు పరిమితమైన ఆప్షన్లతో బయట దొరుకుతాయి. ఎక్కువ లాభాలు, సెక్యూరిటీ ఇచ్చే వీపీఎన్ రూటర్ను జాగ్రత్తగా ఎంచుకోవాలి.
వీపిఎన్ ఎంచుకున్నాక..?
వీపీఎన్ బ్రాడ్బ్యాండ్ కనెక్షన్ ప్రొవైడర్ను ఎంపిక చేసుకున్న తర్వాత 'కిల్ స్విచ్'ను ఆన్ చేసుకోవాలి. ఒకవేళ వీపీఎన్ ఆగిపోతే.. ఇంటర్నెట్ బ్రౌజింగ్ నిలిచిపోయేలా ఈ 'కిల్ స్విచ్' పనిచేస్తుంది. తద్వారా ఇంటర్నెట్ యాక్టివిటీ సురక్షితంగా ఉంటుంది. వీపీఎన్ కనెక్షన్ను లేటెస్ట్ సెక్యూరిటీ ప్రోటోకాల్స్కు అనుగుణంగా అప్డేట్ చేసుకోవడం మాత్రం మర్చిపోవద్దు.
ఇవీ చదవండి-
