వాట్సాప్ ఇటీవల తీసుకొచ్చిన గోప్యతా విధానంతో చాలా మంది సిగ్నల్, టెలిగ్రామ్ వంటి ప్రత్యామ్నాయ యాప్లవైపు మొగ్గు చూపుతున్నారు. ఈ క్రమంలో ఈ రెండు యాప్ల డౌన్లోడ్లు అమాంతం పెరిగాయి. కేవలం రెండు వారాల వ్యవధిలో భారత్లో సిగ్నల్ను డౌన్లోడ్ చేసుకున్న వారి సంఖ్య 2 కోట్ల, 64 లక్షలకు పెరిగినట్లు ప్రముఖ అప్లికేషన్ల విశ్లేషణ సంస్థ 'సెన్సార్ టవర్' పేర్కొంది. గూగుల్, ఆపిల్ ప్లే స్టోర్ల నుంచి ఎక్కువ మంది డౌన్లోడ్ చేసుకున్న వాటిలో సిగ్నల్, టెలిగ్రామ్లు టాప్లో నిలిచినట్లు తెలిపింది.
ఇప్పటివరకూ టాప్లో ఉన్న వాట్సాప్కు ఈ రెండు యాప్లు ప్రధాన పోటీదారులుగా నిలిచాయని వెల్లడించింది. జనవరి 4 నుంచి 17 వరకు సిగ్నల్ డౌన్లోడ్లు 2 కోట్ల 64 లక్షలకు పెరిగితే.. ఇదే సమయంలో టెలిగ్రామ్ డౌన్లోడ్లలో 160శాతం వృద్ధి చెందినట్లు పేర్కొంది. ఈ రెండు వారాల సమయంలో వాట్సాప్ కేవలం 50 లక్షలతో సరిపెట్టుకున్నట్లు స్పష్టం చేసింది.
వాట్సాప్ కొత్త నిబంధనలను వెనక్కి తీసుకోవాలని భారత ప్రభుత్వం వాట్సాప్కు ఇప్పటికే లేఖ రాసింది. పౌరుల వ్యక్తిగత గోప్యత ప్రమాణాల విషయంలో ఏకపక్ష నిర్ణయం ఆమోదయోగ్యం కాదని వాట్సాప్కు సూచించింది. కొత్తగా తీసుకువచ్చిన మార్పుల విషయాన్ని పునరాలోచించాలని పేర్కొంది.
ఇవీ చూడండి:
'వాట్సాప్కు బై- టెలిగ్రామ్, సిగ్నల్కు జై!'
