మొబైల్స్ అంటే విపరీతమైన ఆసక్తి ఉన్నవారికి ఈ వారం బోలెడన్ని విశేషాలు ఉన్నాయి. ప్రత్యేకించి యాపిల్ అభిమానులకు. ఈ అమెరికా సంస్థ అనేక ఉత్పత్తులను లాంచ్ చేసే అవకాశం ఉంది. షియోమీ, హువాయి లాంటి సంస్థలు కూడా తమ కొత్త ఫోన్లను ఈ వారమే విడుదల చేయనున్నాయి. వాటి విశేషాలేంటో చూడండి.
టెక్నో స్పార్క్ 8- సెప్టెంబర్ 13
చైనా సంస్థ ట్రాన్షన్ హోల్డింగ్స్కు చెందిన బ్రాండ్ టెక్నో.. ఈ వారం స్పార్క్ 8 స్మార్ట్ఫోన్ను విడుదల చేయనుంది. దీని ఎంట్రీ లెవెల్ ఫోన్ను ఇప్పటికే నైజీరియాలో లాంచ్ చేసింది. ఆండ్రాయిడ్ 11 గోతో రానున్న ఈ ఫోన్ ఫీచర్లు అత్యాధునికంగా ఉన్నాయి.
ఇన్ఫినిక్స్ జీరో ఎక్స్- సెప్టెంబర్ 13
ట్రాన్షన్ హోల్డింగ్స్కే చెందిన మరో బ్రాండ్ ఇన్ఫినిక్స్.. సెప్టెంబర్ 13నే కొత్త స్మార్ట్ ఫోన్పై ప్రకటన చేయనుంది. హై రిఫ్రెష్ రేట్, పెరిస్కోప్తో ట్రిపుల్ కెమెరా, హీలియో జీ96 ప్రాసెసర్తో ఇన్ఫినిక్స్ జీరో ఎక్స్ రానుందని సమాచారం.
హువాయి ఈవెంట్- సెప్టెంబర్ 13
కంప్యూటర్కు సంబంధించిన వివిధ ఉత్పత్తులపై చైనాలో సెప్టెంబర్ 13న ప్రకటన చేయనుంది హువాయి. ఈ కార్యక్రమంలో తన తొలి ఆఫీస్ ప్రింటర్ గురించి వెల్లడించే అవకాశం ఉంది. ఆల్ ఇన్ వన్ పీసీ, కొత్త మేట్బుక్ పీసీలను కూడా హువాయి ప్రకటించనుందని తెలుస్తోంది.
యాపిల్ ఈవెంట్- సెప్టెంబర్ 14
మంగళవారం రోజున (సెప్టెంబర్ 14) కొత్త ఉత్పత్తులపై ప్రకటన చేయనుంది టెక్ దిగ్గజం యాపిల్. కొత్త ఐఫోన్ 13 సిరీస్, యాపిల్ వాచ్ 7 సిరీస్, కొత్త ఐప్యాడ్లు, మ్యాక్బుక్లను విడుదల చేయబోతుందని సమాచారం.
ఈ కార్యక్రమంలో కొత్త ఐఫోన్ల గురించిన ప్రకటన హైలైట్గా నిలవనుంది. ఫాస్ట్ ఛార్జింగ్ సపోర్ట్, అధిక సామర్థ్యం గల బ్యాటరీ, స్మాలర్ నాచ్, పవర్ఫుల్ ప్రాసెసర్తో ఐఫోన్ 13, ఐఫోన్ 13 మినీ, ఐఫోన్ 13 ప్రో, ఐఫోన్ 13 ప్రో మ్యాక్స్ ఫోన్లు రానున్నాయి.
షియోమీ ఈవెంట్- సెప్టెంబర్ 15
బుధవారం (సెప్టెంబర్ 15) నాడు తన కొత్త ఉత్పత్తులపై ప్రకటన కోసం గ్లోబల్ ఈవెంట్ నిర్వహించనుంది షియోమీ. అందులో షియోమీ 11టీ/ ఎంఐ 11టీ సిరీస్లు సహా, ఎంఐ ప్యాడ్ 5ని విడుదల చేస్తుందని సమాచారం. వీటితో పాటు మరికొన్ని ఉత్పత్తులను లాంచ్ చేసే అవకాశం ఉంది.
ఇన్ఫినిక్స్ హాట్ 11ఎస్- సెప్టెంబర్ 17
భారత్ ఆవల ఇన్ఫినిక్స్ మరో ఉత్పత్తిని విడుదల చేయనుంది. అదే హాట్ 11ఎస్. హీలియో జీ88 ప్రాసెసర్తో వచ్చే ఈ స్మార్ట్ఫోన్లో నాలుగు కెమెరాలుంటాయి. ఇతర ఫీచర్లు అంతగా ఆకట్టుకోనప్పటికీ, ఆకర్షించే డిజైన్తో ఈ ఫోన్ మార్కెట్లోకి రానుంది.
ఇదీ చూడండి: iphone 13: ఐఫోన్-13 ఫీచర్స్ లీక్.. మాములుగా లేవుగా!
