టెలికామ్ రంగంలో పలు సంస్థలు నష్టాలను చవిచూస్తున్న వేళ.. మరికొన్ని లాభాలను ఆర్జిస్తున్నాయి. ఈ నేపథ్యంలో యూజర్లను ఆకర్షించేందుకు పలు టెలికామ్ సంస్థలు ఆకర్షణీయమైన ఆఫర్లను ప్రకటిస్తున్నాయి. భారత మార్కెట్లోని ప్రముఖ టెలికామ్ సంస్థలైన రిలయన్స్ జియో, ఎయిర్టెల్, వొడాఫోన్.. ప్రీపెయిడ్/పోస్ట్ పెయిడ్ వినియోగదారుల కోసం ఓటీటీల సబ్స్క్రిప్షన్ను ఉచితంగా అందిస్తున్నాయి. నెట్ఫ్లిక్స్, అమెజాన్ ప్రైమ్ వీడియో లేదా డిస్నీ+హాట్స్టార్ ఓటీటీల యాక్సెస్ను ఉచితంగా అందించేందుకు కొన్ని రీఛార్జ్ ప్లాన్లను టెలికోలు ప్రకటించాయి. వీటితో అపరితమైన కాల్స్, డాటా సహా ఓటీటీల వినియోగం అదనం. ఈ నేపథ్యంలో వాటికి కావాల్సిన రీఛార్జ్ల వివరాలను తెలుసుకుందాం.
జియో ప్రీపెయిడ్/పోస్ట్ పెయిడ్ రీఛార్జ్తో నెట్ఫ్లిక్స్, ప్రైమ్ వీడియో
రిలయన్స్ జియో పోస్ట్పెయిడ్ వినియోగదారులు రూ.399 రీఛార్జ్తో 75 జీబీ డేటాను పొందుతారు. ఆ డేటా అయిపోయిన తర్వాత ఒక్కో జీబీ డేటాకు రూ.10 వసూలు చేస్తారు. అయితే ఈ ప్లాన్లో 200జీబీ వరకు డేటా రోల్ఓవర్ సదుపాయం ఉంది. దీంతో పాటు రోజుకు 100 ఎస్ఎమ్ఎస్లూ వస్తాయి. వీటికి అదనంగా జియో టీవీ, జియో సినిమా, తదితర యాప్ల వినియోగాన్ని ఉచితంగా అందించింది జియో సంస్థ. ఈ యాప్లతో పాటు నెట్ఫ్లిక్స్, అమెజాన్ ప్రైమ్ వీడియో, డిస్నీ+హాట్స్టార్ సబ్స్క్రిప్షన్ను ఇతర రీఛార్జ్లలోనూ అందించనున్నారు. రూ.599, రూ.799, రూ.999, రూ.1,499 రీఛార్జ్లతోనూ ఈ ఓటీటీల సబ్స్క్రిప్షన్ పొందొచ్చు.వ ఇందులో నెట్ఫ్లిక్స్ మాత్రం మీ బిల్ ప్లాన్పై ఆధారపడి ఉంటుంది.
నోట్: నెట్ఫ్లిక్స్, అమెజాన్ ప్రైమ్ వీడియో, డిస్నీ+హాట్స్టార్లను మై జియో యాప్ ద్వారా కేవలం ఒకే యూజర్ వినియోగించగలరు. ఇందులో మరీ ముఖ్యమైన విషయం ఏంటంటే? నెట్ఫ్లిక్స్ మొబైల్ ప్లాన్ మాత్రమే అందుబాటులో ఉంటుంది. ఇతర టీవీ, కంప్యూటర్లో ఈ యాప్ ద్వారా సినిమాలు చూసే అవకాశం లేదు. అదే విధంగా డిస్నీ+హాట్స్టార్ యాప్లో వీఐపీ సబ్స్క్రిప్షన్ను మాత్రమే పొందగలరు.
ప్రీపెయిడ్ యూజర్లకు రిలయన్స్ జియో డిస్నీ+హాట్స్టార్ సబ్స్క్రిప్షన్ ఇస్తుంది. ఒకవేళ నెట్ఫ్లిక్స్, ప్రైమ్ వీడియోలనూ వినియోగించుకోవాలంటే యూజర్లు పోస్ట్పెయిడ్కు మారాల్సి ఉంటుంది. రూ.401 జియో ప్రీపెయిడ్ రీఛార్జ్తో రోజుకు 3జీబీ డేటాతో పాటు ప్లాన్ మొత్తంపై 6 జీబీ డేటా.. అపరితమైన వాయిస్ కాల్స్, రోజుకి 100 ఎస్ఎమ్ఎస్లు, డిస్నీ+హాస్ట్స్టార్ సబ్స్క్రిప్షన్ లభించనుంది. దీని కాలవ్యవధి 28 రోజులు మాత్రమే!
ఓటీటీల కోసం ఎయిర్టెల్ ప్రీపెయిడ్/పోస్ట్పెయిడ్ ప్లాన్స్:
ఎయిర్టెల్ పోస్ట్పెయిడ్ యూజర్లు రూ.499 రీఛార్జ్ చేస్తే.. 75జీబీ డేటాతో పాటు రోల్ఓవర్ సదుపాయం ఉంటుంది. దీంతో పాటు అపరిమితమైన వాయిస్ కాల్స్, రోజుకు 100 ఎస్ఎమ్ఎస్లు, ఎయిర్టెల్ థ్యాంక్స్ రివార్డ్స్ సహా అమెజాన్ ప్రైమ్ వీడియో, డిస్నీ+హాట్స్టార్ వీఐపీ సబ్స్క్రిప్షన్ను ఏడాది పాటు ఉచితంగా అందించనున్నారు. అయితే జియో పోస్ట్పెయిడ్ ప్లాన్తో పోల్చుకుంటే.. నెట్ఫ్లిక్స్ సబ్స్క్రిప్షన్ ఎయిర్టెల్ యూజర్లకు ఉచిత వెసులుబాటు లేదు. ఎయిర్టెల్ థ్యాంక్స్ యాప్ ద్వారా ప్రైమ్ వీడియోను యాక్టివేట్ చేసుకోవచ్చు.
ఎయిర్టెల్ ప్రీపెయిడ్ ప్లాన్ యూజర్లకూ నెట్ఫ్లిక్స్ ఫ్రీ సబ్స్క్రిప్షన్ వెసులుబాటు లేదు. అయితే ప్రీపెయిడ్ ప్లాన్స్ ద్వారా డిస్నీ+హాట్స్టార్ వీఐపీ, అమెజాన్ ప్రైమ్ వీడియో ఉచిత సదుపాయం ఉంటుంది. రూ.599 ప్రీపెయిడ్ ప్లాన్తో రోజుకు 2 జీబీ డేటా.. అపరితమైన వాయిస్ కాల్స్, రోజుకు 100 ఎస్ఎమ్ఎస్లు సహా అమెజాన్ ప్రైమ్ వీడియో మొబైల్ ఎడిషన్, డిస్నీ+హాట్స్టార్, ఎయిర్టెస్ ఎక్స్ట్రీమ్, వింక్ మ్యూజిక్ ఫ్రీ సబ్స్క్రిప్షన్ వస్తుంది. దీని కాల వ్యవధి 56 రోజులు మాత్రమే!
వొడాఫోన్ ఐడియా(వి) ఓటీటీ ప్లాన్స్:
రూ.499ల వొడాఫోన్ ఐడియా(వి) పోస్ట్పెయిడ్ ప్లాన్లో 75 జీబీల డేటా(200 జీబీ వరకు రోల్ ఓవర్ ఫెసిలిటీ), అపరిమితమైన వాయిస్ కాలింగ్, రోజుకు 100 ఎస్ఎమ్ఎస్లు సహా అమెజాన్ ప్రైమ్ వీడియో, జీ5తో పాటు వి మూవీస్, టీవీ యాప్స్ సబ్స్క్రిప్షన్ ఉచితంగా లభిస్తోంది. ఈ ప్లాన్లో నెట్ఫ్లిక్స్, డిస్నీ+హాట్స్టార్ ఓటీటీల వెసులుబాటు లేదు.
ఒకవేళ వొడాఫోన్ ఐడియా యూజర్లు నెట్ఫ్లిక్స్ యాక్సెస్ కావాలనుకుంటే.. రెడ్ఎక్స్ ప్లాన్ను యాక్టివేట్ చేసుకోవాల్సి ఉంటుంది. అందుకోసం నెలకు రూ.1,099లను వెచ్చించాల్సి ఉంటుంది. ఈ ధరతో నెట్ఫ్లిక్స్ను 6 నెలల పాటు వాడుకోవచ్చు. ఏడాది పాటు నెట్ఫ్లిక్స్ టీవీ, మొబైల్ ప్లాన్లను వినియోగించుకోవచ్చు. నిజానికి రెడ్ఎక్స్ ప్లాన్ కోసం ఏడాదికి రూ.5,988 చెల్లిస్తే.. జీ5 మెంబర్షిప్, అమెజాన్ప్రైమ్ వీడియోల ఏడాది సబ్స్క్రిప్షన్ ఉచితంగా లభించనుంది.
వొడాఫోన్ ఐడియా ప్రీపెయిడ్ ప్లాన్స్లో కేవలం డిస్నీ+హాట్స్టార్, జీ5 యాప్ల సబ్స్క్రిప్షన్ మాత్రమే లభిస్తుంది. ఒకవేళ యూజర్లకు మిగిలిన రెండు ఓటీటీల(నెట్ఫ్లిక్స్, అమెజాన్ ప్రైమ్ వీడియో) వెసులుబాటు కావాలంటే పైన చెప్పిన రీఛార్జ్ ప్లాన్ను కొనుగోలు చేయాల్సిఉంది. రూ.401 ప్రీపెయిడ్ ప్లాన్తో రోజుకు 3జీబీ డేటా(అదనంగా 16 జీబీ డేటా), అపరిమితమైన వాయిస్ కాల్స్, రోజుకు 100 ఎస్ఎమ్ఎస్లు.. 28 రోజుల వ్యవధిలో రానున్నాయి. డిస్నీ+హాట్స్టార్, జీ5 ఓటీటీలకు అదనంగా వెచ్చించాల్సిన అవసరం లేదు.
ఇదీ చూడండి.. జియో ధమాకా రీఛార్జ్.. ఒకటి కొంటే మరొకటి ఉచితం!
