ఇప్పటికే అనేక వ్యాపారాల్లో ఉన్న దిగ్గజ సంస్థ అమెజాన్.. సొంత బ్రాండ్ టీవీలను తీసుకొస్తున్నట్లు గురువారం ప్రకటించింది. రెండు వేరియంట్లలో వీటిని అందుబాటులోకి తీసుకురానుంది. ఒకటి హైఎండ్ అమెజాన్ ఫైర్ టీవీ ఓమ్నీ సిరీస్ కాగా, రెండోది అందుబాటు ధరలో ఉండే అమెజాన్ ఫైర్ టీవీ 4సిరీస్. రూ.27వేల నుంచి రూ.80వేల రేంజ్లో వీటిని అక్టోబర్ను మార్కెట్లోకి తీసుకురానుంది.
ఇప్పటివరకు టీవీల్లో ప్లగ్ఇన్ చేసుకునే స్ట్రీమింగ్ స్టిక్స్ను మాత్రమే అమెజాన్ అమ్మింది. తోషిబా, ఇన్సిగ్నియా లాంటి సంస్థలతో అమెజాన్ ఫైర్ ఇంటర్ఫేస్తో టీవీ సెట్స్ను రూపొందించడానికి కలిసి పనిచేసింది. దాని ద్వారా అమెజాన్ ప్రైమ్ వీడియో సహా ఇతర స్ట్రీమింగ్ సేవలను వాయిస్ కంట్రోల్ ద్వారా యాక్సెస్ చేయొచ్చు.
త్వరలోనే సొంతంగా టీవీలు..
ప్రస్తుతానికి డిజైన్, తయారీలో థర్డ్ పార్టీ సహకారం తీసుకుంటున్న అమెజాన్.. త్వరలోనే సొంతంగా టీవీలను తయారు చేసుకోవాలని భావిస్తోంది. తద్వారా ఫైర్ టీవీ సాఫ్ట్వేర్ను అలెక్సా వాయిస్ కంట్రోల్తో మెరుగ్గా ఇంటిగ్రేట్ చేస్తామని చెబుతోంది. అంతేకాక, పోటీదారులను ఇరకాటంలో పెట్టేలా సొంతంగా ధరలను నిర్ణయించే స్వేచ్ఛ కూడా లభిస్తుంది.
అమెజాన్ ఫైర్ టీవీ ఓమ్నీ సిరీస్
- హైయర్-ఎండ్ అమెజాన్ ఫైర్ టీవీ ఓమ్నీ సిరీస్ ఐదు సైజుల్లో రాబోతోంది. 43 అంగుళాలు- రూ.30వేలు ($409.99), 50 అంగుళాలు-రూ.37,500 ($509.99), 55 అంగుళాలు-రూ.41వేలు ($559.99), 65 అంగుళాలు-రూ.61వేలు ($829.99), 75 అంగుళాలు-రూ.80వేలు ($1,099.99).
- 'ఫైర్ టీవీ క్యూబ్' లాగానే రీమోట్ వాడకుండా వాయిస్తోనే ఈ టీవీని కంట్రోల్ చేయొచ్చు. మనకు నచ్చిన టీవీ షో, సినిమా, మ్యూజిక్ పెట్టమని, వాతావరణ సమాచారం కోరడం, ఇంట్లోని స్మార్ట్ పరికరాలను కంట్రోల్ చేయడం, టీవీ చూస్తుండగానే స్మార్ట్ హోమ్ కెమేరాలను తెరపై చూడటం లాంటివెన్నో ఈ టీవీలో ఉంటాయి.
- డాల్బీ డిజిటల్ ప్లస్ ఆడియో సపోర్ట్
- ఇంట్లోని ఎకో స్పీకర్లను ఆటోమెటిక్గా గుర్తించి, వాటిని స్టీరియో లేదా సరౌండ్ సౌండ్ టీవీ స్పీకర్స్గా వాడొచ్చు.
- 65, 75 అంగుళాల వెర్షన్లలో మరింత కలర్ఫుల్ డాల్బీ విజన్ హెచ్డీఆర్
అమెజాన్ ఫైర్ టీవీ 4 సిరీస్
- 43 అంగుళాలు-రూ.27వేలు ($369.99), 50 అంగుళాలు- రూ.34,500 ($469.99), 55 అంగుళాలలో-రూ.38వేలు ($519.99) అమెజాన్ ఫైర్ టీవీ 4 సిరీస్ విడుదలకానుంది.
- వీటిల్లో మోడర్న్ లుక్ ఉండకపోవచ్చు. వెబ్ క్యామ్ సదుపాయం కూడా లేకపోవచ్చు.
- వాయిస్ రీమోట్లోని అలెక్సా బటన్ నొక్కిన తర్వాతే 4సిరీస్ను అలెక్సాతో ఇంటిగ్రేట్ చేయవచ్చు. ఓమ్నీ సిరీస్ టీవీల్లో లాగా 4సిరీస్లో నేరుగా టీవీతో మాట్లాడే అవకాశం లేదని తెలుస్తోంది. అయితే కొన్ని సినిమాలు, టీవీ షోలు లాంటివి ప్లే చేయమని, స్పోర్ట్స్ స్కోర్లు, వాతావరణ సమాచారం అడిగే అవకాశం ఉంది.
- హెచ్ఎల్జీ, హెచ్డీఆర్10 లాంటి ఆధునిక సాంకేతికతో 4సిరీస్ వస్తోంది. అయితే వీటిలో ఓమ్నీలోలాగా డాల్బీ విజన్ సపోర్ట్ ఉండదని సమాచారం.
ఇదీ చూడండి: Amazon Alexa: ఆండ్రాయిడ్ ఫోన్లలోనూ అలెక్సా
