ప్రేమించిన యువతి పెళ్లికి నిరాకరించిందని మనస్థాపానికి గురైన ఓ యువకుడు పురుగుల మందు తాగి బలవన్మరణానికి పాల్పడిన ఘటన ఖమ్మంలో చోటుచేసుకుంది. వరంగల్ లేబర్ కాలనీకి చెందిన గడ్డి కొప్పల శ్రీకాంత్, ఖమ్మం నగరానికి చెందిన ఓ యువతి మూడేళ్లుగా ప్రేమించుకుంటున్నారు. ఇటీవల యువతి సరిగ్గా మాట్లాడటం లేదని... ఖమ్మం వచ్చి యువతి ఇంటికి వెళ్లి అడిగాడు. యువతి తల్లిదండ్రులు అతడిని రెండో పోలీస్ స్టేషన్లో అప్పగించారు. పోలీసులు ఇద్దరికీ కౌన్సిలింగ్ ఇచ్చారు.
యువతి శ్రీకాంత్ని ప్రేమించడం లేదని చెప్పింది. దీంతో మనస్తాపానికి గురై ఆదివారం మధ్యాహ్నం ఖమ్మం లెనిన్నగర్లోని తమ బంధువుల ఇంట్లో పురుగుల మందు తాగాడు. ఆసుపత్రికి తరలించి చికిత్స అందిస్తుండగా మృతి చెందాడు. శ్రీకాంత్ పదో తరగతి వరకు చదివి కారు నడుపుతున్నాడు. మృతుడికి తండ్రి లేడు. తల్లి అక్క ఉన్నారు. వారి రోదనలతో ఖమ్మం ప్రభుత్వ ఆసుపత్రి మార్చూరీ వద్ద విషాదఛాయలు అలుముకున్నాయి. పోలీసులు కేసు నమోదు చేసి దర్యాప్తు చేస్తున్నారు.
ఇదీ చూడండి: అనుమానంతో భార్యను కడతేర్చిన పోలీస్ భర్త
