ప్రాణాలు తీసిన రోడ్డు ప్రమాదం.. ఘటనా స్థలంలో గంజాయి లభ్యం!

ప్రమాదవశాత్తు ద్విచక్రవాహనం డివైడర్​ను ఢీకొని ఇద్దరు విద్యార్థులు మృతి చెందిన ఘటన మేడ్చల్​ జిల్లాలో చోటు చేసుకుంది. మృతులు కామారెడ్డి​, మంచిర్యాల జిల్లాల వాసులుగా పోలీసులు గుర్తించారు. ఘటనా స్థలంలో మృత దేహాల వద్ద కేజీ గంజాయి లభ్యమైంది. మత్తులో వేగంగా నడిపి ప్రమాదానికి గురయ్యారా అనే కోణంలో పోలీసులు దర్యాప్తు చేస్తున్నారు.

అర్ధరాత్రి ప్రమాదవశాత్తు డివైడర్​ను ఢీకొనడంతో ఇద్దరు విద్యార్థులు మృతి చెందిన ఘటన మేడ్చల్ జిల్లాలో జరిగింది. కామారెడ్డి​, జిల్లాకు చెందిన సుజిత్, మంచిర్యాల జిల్లాకు చెందిన విశాల్ ఇద్దరు సెయింట్ పీటర్స్ కళాశాలలో ఇంజినీరింగ్ చివరి సంవత్సరం చదువుతున్నారు. మైసమ్మ గూడలోని ఓ వసతి గృహంలో ఉంటున్నారు. అర్ధరాత్రి సమయంలో సురారం నుంచి వసతి గృహానికి బైక్​పై వెళ్తుండగా కట్టమైసమ్మ వద్ద ద్విచక్రవాహనం అదుపుతప్పడంతో డివైడర్​ను ఢీకొన్నారు. దీంతో ఇద్దరు అక్కడికక్కడే మృతి చెందారు.

సమాచారం అందుకున్న దుండిగల్​ పోలీసులు ఘటనా స్థలికి చేరుకుని పరిశీలించగా వారివద్ద ఒక కేజీ గంజాయి లభ్యమైంది. మృతదేహాలను పోస్టుమార్టం నిమిత్తం ఉస్మానియా ఆస్పత్రికి తరలించారు. కేసు నమోదు చేసుకొని దర్యాప్తు చేస్తున్నారు.

ఇదీ చదవండి: రూ.4 లక్షల విలువైన నిషేధిత గుట్కా స్వాధీనం..