మేడ్చల్ మల్కాజ్గిరి జిల్లా సికింద్రాబాద్ పరిధిలోని జవహర్ నగర్ మున్సిపల్ కార్పొరేషన్ కార్యాలయంలో చోరీ జరిగింది. డీఈ కృష్ణ క్యాబిన్లో దాదాపు రూ.63 వేల నగదు అపహరణకు గురైనట్టు అధికారులు తెలిపారు. ఎప్పట్లాగే కార్యాలయానికి వచ్చిన సిబ్బంది తలుపులు తెరిచి చూడగా.. డీఈ కృష్ణ గదిలోని లాకర్ తెరిచి ఉండటం గమనించారు. అనుమానం వచ్చి పరిశీలించగా.. అందులో ప్రభుత్వానికి చెందిన రూ.63 వేలు కనిపించలేదు. నగదుతో పాటు.. ఏవైనా కీలక దస్త్రాలు అపహరించారా అనే కోణంలో పోలీసులు దర్యాప్తు చేస్తున్నారు.
మున్సిపల్ కార్యాలయంలో చోరీ జరగడం పట్ల సర్వత్రా అనుమానాలు వ్యక్తమవుతున్నాయి. కార్యాలయ సిబ్బందే దొంగతనం చేశారా.. లేక ఇంకెవరైనా చోరీకి పాల్పడ్డారా అనే కోణంలో పోలీసులు దర్యాప్తు చేస్తున్నారు. కాగా.. కార్యాలయం ఆవరణలోని సీసీ కెమెరాలు పనిచేయకపోవడం గమనార్హం.
