ఆన్లైన్ మోసాలకు అడ్డూఅదుపు లేకుండా పోతోంది. సైబర్ మోసగాళ్ల గేలానికి చిక్కి అమాయకులు లక్షలు పొగొట్టుకుంటున్నారు. హైదరాబాద్, సైబరాబాద్, రాచకొండ కమిషనరేట్ల పరిధిలో రోజుకు కనీసం 30 నుంచి 50 లక్షల వరకు సైబర్ నేరగాళ్లు కాజేస్తున్నారు.
కస్టమర్ కేర్ అంటూ...
సికింద్రాబాద్ బాలంరాయ్కి చెందిన నాగమల్లేశ్ తన ఫోన్లో గూగుల్ పే ద్వారా తెలిసిన వారికి డబ్బు పంపించాడు. ఆ డబ్బులు వారి ఖాతాలో జమ కాలేదు. దాంతో కస్టమర్ కేర్ కోసం అంతర్జాలంలో వెతికి... ఓ నెంబరుకు ఫోన్ చేస్తే... స్పందించలేదు. తర్వాత ఆ వ్యక్తే మల్లేశ్కి ఫోన్ చేయగా... సమస్యను వివరించాడు. వెంటనే క్విక్ సపోర్ట్ యాప్ను డౌన్లోడ్ చేయించి... బాధితుని ఖాతాలోంచి ఏకంగా రూ.2లక్షల 20 వేలు కొట్టేశాడు.
సికింద్రాబాద్కు చెందిన సాలోమన్రాజు.. తన గూగుల్పే సరిగా పనిచేయకపోవటం వల్ల కస్టమర్కేర్కు ఫోన్ చేశాడు. మొదట్లో ఎవరూ స్పందించలేదు. తర్వాత కస్టమర్ కేర్ నుంచి మాట్లాడుతున్నామని చెప్పి అన్ని వివరాలు తెలుసుకుని రూ.86 వేలు దోచేశారు.
రుణమిస్తామని నమ్మించి...
సికింద్రాబాద్కు చెందిన శివరాజుకు రుణం ఇస్తామని ఓ వ్యక్తి ఫోన్ చేశాడు. వివరాలు తెలుసుకొని లక్షన్నర వరకు ఇచ్చే వెసులుబాటు ఉందని శివరాజును నమ్మించాడు. ముందుగా జీఎస్టీ కట్టాలని రూ. 24వేలు, ఎన్వోసీ కోసమని రూ.45 వేలు ఇలా మొత్తం లక్షన్నర తన ఖాతాలో వేయించుకున్నాడు. మళ్లీ ఆ నెంబర్కి బాధితుడు ఫోన్ చేస్తే స్పందన లేకపోయేసరికి... మోసపోయినట్లు గ్రహించి పోలీసులను ఆశ్రయించాడు.
కేవైసీ అప్డేట్ అంటూ...
పద్మారావునగర్కు చెందిన దిలీప్ కుమార్కు గుర్తు తెలియని వ్యక్తి ఫోన్ చేసి... పేటీఎం, కేవైసీ అప్డేట్ చేసుకోవాలని సూచించాడు. అందుకు దిలీప్ సంసిద్ధత వ్యక్తం చేయగా... ఎనీడెస్క్ యాప్ను డౌన్లోడ్ చేయించాడు. కొద్దిసేపట్లోనే ఖాతాలోంచి రూ.94 వేలు మాయమవగా... బాధితుడు వెంటనే సైబర్ క్రైమ్ పోలీసులకు ఫిర్యాదు చేశాడు.
ఖాతా అప్డేట్ అంటూ...
బోయినపల్లికి చెందిన రమణకు బ్యాంక్ అధికారి అంటూ గుర్తు తెలియని వ్యక్తి ఫోన్ చేశాడు. ఖాతాను అప్డేట్ చేసుకోవాలని సూచించి... పూర్తి వివరాలు తెలుసుకున్నాడు. కొద్దిసేపటిలో ఖాతాలోంచి రూ.1.25 లక్షలు డ్రా అయినట్లు మేసేజ్ రావడంతో బాధితుడు వెంటనే పోలీసులను ఆశ్రయించాడు.
బాధితుల ఫిర్యాదు మేరకు హైదరాబాద్ సైబర్ క్రైమ్ పోలీసులు కేసు నమోదు చేసుకొని దర్యాప్తు ప్రారంభించారు.
