మంత్రి కేటీఆర్​ పేరు వాడుకుని మోసం చేయాలనుకుని...

సులభంగా డబ్బు సంపాదించాలనే ఉద్దేశంతో ఇద్దరు యువకులు ఏకంగా మంత్రి పేరుతోనే అక్రమాలకు తెరలేపారు. నల్గొండ జిల్లా తిరుమలగిరికి చెందిన ఓ వ్యక్తి అదే గ్రామానికి చెందిన మహిళకు చెందిన భూమి వివాదంలో ఉన్నదంటూ బెదిరించి బేరసారాలు చేశాడు. బాధితుల ఫిర్యాదుతో కటకటాలపాలయ్యాడు.

నల్గొండ జిల్లా తిరుమలగిరి మండల కేంద్రానికి చెందిన శాగం ఈశ్వరమ్మకు చలకుర్తి చివారులో 8.20 ఎకరాల భూమి ఉంది. ఆమెకు అదే గ్రామానికి చెందిన అనుముల సైదులు ఫోన్​ చేసి... ఈశ్వరమ్మకు చెందిన భూమిపై సెక్రటేరియట్​లో పలు ఫిర్యాదులు వచ్చాయని... ఆ భూమిని మంత్రి కేటీఆర్​ పేదలకు పంచి ఇచ్చేలా ఆదేశించారని మాయమాటలు చెప్పాడు. దానిని ప్రభుత్వపరం కాకుండా చూడాలంటే తనకు రూ.50 లక్షలు ఇవ్వాలని బెదిరించాడు. ఆ భూమి విషయమై రోజుకు పలుమార్లు ఫోన్​ చేసేవాడు. ఉన్నతాధికారుతో మాట్లాడిస్తానని చెప్పి చలకుర్తికి చెందిన గౌతమ్ రెడ్డితో ఫోన్ కాన్ఫరెన్స్​పెట్టి డబ్బులు డిమాండ్​ చేసేవాడు.

ఈ వ్యవహారమై బాధితురాలు హైదరాబాద్​లో ఉన్న తన కుమారుడి దగ్గరకు వెళ్లి చెప్పింది. ఫోన్​ నంబర్ల ఆధారంగా ఆమె కుమారుడు ఎల్బీనగర్​ పోలీసులకు ఫిర్యాదు చేశాడు. డబ్బులు ఇస్తామని చెప్పి రమ్మని.. నిందితులను పోలీసులు అదుపులోకి తీసుకున్నారు.

ఇదీ చూడండి: ఆ అనుమానంతోనే తల్లిని కడతేర్చాడా..?