నాగర్కర్నూలు జిల్లా కేంద్రంలో ఓ మహిళా మెడలో నుంచి దొంగ.. చైన్ స్నాచింగ్ చేసి పారిపోతుండగా... ఇద్దరు యువకులు సినీ ఫక్కీలో ఆ దొంగను వెంబడించారు. ఆ దుండగుడు చైన్, బైక్ను వదిలి పారిపోయాడు.
అసలేం జరిగిందంటే...
నాగర్ కర్నూల్ జిల్లా కేంద్రంలోని నల్లవెల్లి రోడ్ సంఘమేశ్వర బ్యాంక్ ముందు నుంచి మున్సిపాలిటీకి వెళ్లేదారిలో మానస అనే మహిళ వెళ్తుంది. ఆ సమయంలోనే ఓ వ్యక్తి ఆమె మెడలోంచి 4 తులాల మంగళసూత్రాన్ని ఎత్తుకెళ్లాడు. దీనితో ఆమె అరిచింది. అక్కడే ఉన్న యువకులు ఆ బైకర్ను సినీ ఫక్కీలో వెంబడించారు. దొంగ బైక్ను వీరి బైక్తో వేగంగా ఢీకొట్టారు. ఈ తరుణంలో దొంగను పట్టుకునే ప్రయత్నంలో అతను వేసుకున్న స్వెట్టర్ను పట్టుకోగా... చైన్, బైక్, అతని జాకెట్ను వదిలేసి దొంగ తప్పించుకుని పరారయ్యాడు.
అతను వదిలి వెళ్లిన బైక్ ప్యాషన్ ప్రో వాహనం కాగా.. దానికి నంబర్ ప్లేట్ కూడా లేదు. బైక్ కవర్లో ఓ ఇనుప చైన్ ఉంది. సీసీ కెమెరాలు పరిశీలించి... ఆ దొంగను గుర్తించే పనిలో పోలీసులు ఉన్నారు. కాగా దుండగుడిని పట్టుకోవడానికి ప్రయత్నించిన యువకుల చేతులకు స్వల్ప గాయాలయ్యాయి. దొంగను చాకచక్యంగా పట్టుకోవడానికి ప్రయత్నించిన యువకులను స్థానికులు ప్రశంసించారు.
