ఆమె ఓ రాకుమారి.. పెద్ద విల్లాలో జీవనం. నాణేనికి ఇది ఓవైపు చిత్రం. మరోవైపు ఆ విల్లాయే ఆమెకు జైలు. అందులో ఆమె బందీ. బాహ్య ప్రపంచపు స్వేచ్ఛా వాయువులకు బహుదూరంగా బిక్కుబిక్కుమంటూ గడుపుతోంది. అసలు తాను ఎప్పటికైనా బయటపడగలనా? అని అంతులేని ఆవేదనలో ఉంది. ఇది దుబాయ్ యువరాణి 'వ్యథార్థ' గాథ. ఆమె.. రాచరికపు పాలనలోని యునైటెడ్ అరబ్ ఎమిరేట్స్ (యూఏఈ) ప్రధాని, ఉపాధ్యక్షుడు, శక్తిమంతమైన నేత షేక్ మహమ్మద్ బిన్ రషీద్ ఆల్ మక్తోమ్ కుమార్తె లతీఫా. బీబీసీ పరిశోధనాత్మక కథనాల్లో భాగంగా మంగళవారం విడుదల చేసిన ఓ వీడియో ద్వారా ఆమె పరిస్థితి వెలుగులోకి వచ్చింది.
నేను ఓ బందీని. ఈ విల్లాను జైలులా మార్చేశారు. కనీసం స్వచ్ఛమైన గాలి పీల్చేందుకు కూడా నేను బయటకు వెళ్లలేను. నేను ఎప్పుడు విడుదల అవుతానో.. అప్పటికి నా పరిస్థితి ఎలా ఉంటుందో కూడా తెలీదు.
-లతీఫా, దుబాయ్ యువరాణి
ఈ వీడియోలను నెలల తరబడి ఆమె రహస్యంగా ఫోన్లో తీసి పంపించినట్లు బీబీసీ వెల్లడించింది. అయితే ఇవి కూడా 6 నెలలు క్రితం నాటివని, ఆ తర్వాత వీడియోలు రావడం ఆగిపోయినట్లు ఆమె సమీప బంధువు, బ్రిటన్లో ఉంటున్న మార్కస్ ఎసాబ్రీ బీబీసీకి తెలిపారు. కాగా తాజా పరిణామాలపై యూఏఈలతో చర్చిస్తామని ఐక్యరాజ్య సమితి మానవ హక్కుల హైకమిషనర్ కార్యాలయం తెలిపింది. ఈ విషయమై ఐరాసకు తాము మద్దతిస్తామని బ్రిటీష్ విదేశాంగ శాఖ మంత్రి డొమినిక్ రాబ్ తెలిపారు. తన కుటుంబ సంరక్షణలో లతీఫ్ సురక్షితంగానే ఉన్నట్లు షేక్ మహమ్మద్ వెల్లడించారు.
బందీ వెనుక కథ..
ఆమె బందీగా ఉండటం వెనుక ఓ కథ ఉంది. మితిమీరిన నిబంధనలు, నిర్బంధాలతో విసిగిపోయిన ఆమె 2018లో మాజీ ఫ్రెంచి గూఢచారి సాయంతో దేశం నుంచి పారిపోవడానికి ప్రయత్నిస్తూ ఓ పడవ ఎక్కారు. ఇది తెలుసుకున్న కమాండోలు ఆమె పడవను చుట్టుముట్టి వెనక్కి తీసుకొచ్చారు. అప్పటి నుంచి ఆమెకు సంబంధించిన సమాచారమేదీ బయటకు రాలేదు.
ఇదీ చదవండి : అమెరికాపై 'హిమ ఖడ్గం'- 11 మంది మృతి
