ఇజ్రాయెల్​కు షాక్! రాకెట్లతో హమాస్ ఎదురుదాడి- నెతన్యాహు దళాలు వెనక్కి!

Israel Hamas War : గాజాపై బాంబులతో విరుచుకుపడుతున్న ఇజ్రాయెల్​పై రాకెట్లతో చెలరేగింది హమాస్. వందలాది రాకెట్లను హమాస్ ప్రయోగించినట్లు అధికారులు తెలిపారు. అయితే, ఎవరికీ గాయాలు కాలేదని చెప్పారు. మరోవైపు, ఉత్తర గాజా నుంచి వేల మంది సైనికులను వెనక్కి రప్పించింది ఇజ్రాయెల్.

Israel Hamas War : గాజాపై భీకర దాడులు చేస్తున్న ఇజ్రాయెల్​కు నూతన సంవత్సరం తొలిరోజే ఊహించని పరిణామం ఎదురైంది. దాదాపు మూడు నెలలుగా గాజాపై బాంబు దాడులతో ఇజ్రాయెల్ విరుకుపడుతుండగా తాజాగా హమాస్ చెలరేగింది. గాజా నుంచి వందలాది రాకెట్లు ఇజ్రాయెల్ వైపు దూసుకొచ్చాయి. వాటిని ఇజ్రాయెల్ గగనతల రక్షణ వ్యవస్థలు అడ్డుకోగా పెద్ద శబ్దాలతో ఆకాశంలో పేలుళ్లు సంభించాయి. దక్షిణ, మధ్య ఇజ్రాయెల్ ప్రాంతాల్లో ఈ రాకెట్లు పడినట్టు తెలుస్తోంది. హమాస్ వందలాది రాకెట్లను ప్రయోగించినా ఎవరికీ గాయాలు కాలేదని ఇజ్రాయెల్ అధికారులు వెల్లడించాయి.

2023 అక్టోబర్ 7 న ఇజ్రాయెల్ పై 2వేల రాకెట్లతో హమాస్ విరుచుకుపడింది. తర్వాత ఇజ్రాయెల్ సరిహద్దులను ధ్వంసం చేసిన హమాస్ మిలిటెంట్లు ఆ దేశంలోకి ప్రవేశించి బీభత్సం సృష్టించారు. ఆ దాడుల్లో 12 వందల మంది ఇజ్రాయెల్ పౌరులు చనిపోయారు. 240 మందిని హమాస్ మిలిటెంట్లు బంధించి తీసుకెళ్లారు. ఆ ఘటన తర్వాత గాజాపై ఇజ్రాయెల్ భీకర దాడులు చేస్తూనే ఉంది. ఇప్పుడు హమాస్ మిలిటెంట్లు ప్రతిదాడులు చేశారు.

ఇజ్రాయెల్- హమాస్ యుద్ధం

ఇజ్రాయెల్ సైన్యం వెనక్కి
గాజాలోని ఉత్తర ప్రాంతం నుంచి వేల సంఖ్యలో ఇజ్రాయెల్ సైన్యం వెనక్కి వెళ్లడం చర్చనీయాంశమైంది. యుద్ధం ప్రారంభమయ్యాక సైన్యాన్ని నెతన్యాహు సర్కారు వెనక్కి పిలవడం ఇదే తొలిసారి కావడం వల్ల దీనిపై రకరకాల ఊహాగానాలోస్తున్నాయి. అయితే ఉత్తర ప్రాంతంలో ఆపరేషన్ పూర్తయిందని, దక్షిణ ప్రాంతంపై దృష్టి సారించడానికే సైన్యం ఉపసంహరణ చేపట్టామని ఇజ్రాయెల్ చెబుతోంది. మరోవైపు యుద్ధ తీవ్రతను తగ్గించాలని ఆయుధాలను అందిస్తున్న మిత్రదేశమైన అమెరికా నుంచి ఒత్తిడి పెరగడమూ ఇజ్రాయెల్ ఈ చర్యలు చేపట్టిందనే ప్రచారం జరుగుతోంది.

ఇజ్రాయెల్ యుద్ధ ట్యాంకులు

'ఉపసంహరణ అందుకే'
గాజా ఉత్తర ప్రాంతంపై పూర్తి నియంత్రణ సాధించామని, అందుకే సైన్యాన్ని వెనక్కి తీసుకొచ్చామని ఇజ్రాయెల్ ప్రకటించింది. శిక్షణ, విశ్రాంతి నిమిత్తం రానున్న రోజుల్లో వేలాది మంది సైనికులను గాజా యుద్ధభూమి నుంచి ఉపసంహరించనున్నట్లు పేర్కొంది. గాజాలోని కొన్ని ప్రాంతాల్లో యుద్ధం తగ్గుముఖం పట్టిన నేపథ్యంలో సమీపంలోని మిలటరీ స్థావరాల కార్యకలపాల కోసం సైన్యం తరలింపు చేపట్టినట్లు ఇజ్రాయెల్ వెల్లడించింది. యుద్ధ లక్ష్యాలు సుదీర్ఘంగా ఉంటాయని సైన్యాన్ని దాని కోసం సిద్ధం చేస్తున్నట్లు ఇజ్రాయెల్ ఆర్మీ తెలిపింది.