America Help Pakistan : దాయాది దేశం పాకిస్థాన్కు 450 మిలియన్ల డాలర్ల భారీ భద్రతా సహాయం అందించేందుకు జో బైడెన్ సర్కార్‌ ముందుకు వచ్చింది. ఉగ్రవాద నిరోధక చర్యల్లో భాగంగా ఎఫ్‌-16 ఫైటర్ జెట్లను అందించనుంది. నాలుగేళ్లలో మొదటిసారి ఈ తరహా సహాయానికి అమెరికా అధ్యక్షుడు బైడెన్ ఆమోదం తెలిపారు.
450 మిలియన్ల డాలర్ల అంచనా వ్యయంతో ఎఫ్‌-16 యుద్ధవిమానాలను విదేశీ సైనిక విక్రయానికి ఆమోదిస్తూ యూఎస్ స్టేట్ డిపార్ట్‌మెంట్ నిర్ణయం తీసుకుంది. ఈ ప్రతిపాదిత విక్రయం గురించి కాంగ్రెస్‌కు వెల్లడించింది. ఉగ్రవాదాన్ని ఎదుర్కోవడంలో తమకు పాక్ ఒక ముఖ్య భాగస్వామి అని పేర్కొంది. ఈ సహాయం వల్ల ఆ ప్రాంతంలో భద్రతాపరమైన సమతౌల్యానికి ఎలాంటి హాని ఏర్పడదని చెప్పింది. ఇదిలా ఉంటే.. 2018లో అప్పటి అధ్యక్షుడు డొనాల్డ్ ట్రంప్‌ పాకిస్థాన్కు రెండు బిలియన్ల డాలర్ల సహాయాన్ని నిలిపివేశారు. అఫ్గాన్‌ తాలిబన్లు, హక్కానీ నెట్‌వర్క్‌ వంటి ఉగ్ర గ్రూపులను నిలువరించడంలో విఫలమవుతుందంటూ ఆ సహకారాన్ని ఆపేశారు. అలాగే ఉగ్రవాదంపై పోరాటంలో పాక్ తమ భాగస్వామి కాదని ఆ సందర్భంగా పేర్కొన్నారు.
మరోవైపు.. ఉక్రెయిన్, ఐరోపా దేశాలకు అమెరికా 2 బిలియన్ల డాలర్లు సాయం చేయనున్నట్లు ఆ దేశ విదేశాంగ మంత్రి ఆంటోనీ బ్లింకెన్ గురువారం ప్రకటించారు. రష్యా నుంచి ముప్పు ఎదుర్కొంటున్న ఉక్రెయిన్ సహా మరో 18 పొరుగు దేశాలకు సైనిక సహాయాన్ని అందించనున్నట్లు బ్లింకెన్ తెలిపారు. అంతకుముందు జర్మనీలో జరిగిన ఓ సమావేశంలో 675 మిలియన్ల డాలర్లను.. ఉక్రెయిన్కు ఆయుధాల కొనుగోలు కోసం అందిస్తామని అమెరికా రక్షణ మంత్రి లాయిడ్ ఆస్టిన్ ప్రకటించారు.
ఇవీ చదవండి: ఫేస్బుక్లో లైవ్ ఇస్తూ కాల్పులు.. కారులో ఊరంతా తిరుగుతూ దాడులు.. నలుగురు మృతి
