బ్రెగ్జిట్ ఒప్పందం కోసం రాజీ ప్రణాళికలను బ్రస్సెల్స్కు సమర్పించనున్నట్లు ప్రకటించారు బ్రిటన్ ప్రధానమంత్రి బోరిస్ జాన్సన్. ఆర్థిక వ్యవస్థపై తీవ్ర ప్రభావం పడుతుందన్న భయాలు ఉన్నప్పటికీ ఈ ప్రతిపాదనలు ఆమోదించాలన్నారు. లేదంటే ఐరోపా సమాఖ్య(ఈయూ) నుంచి ఈ నెల చివరికల్లా ఎలాంటి ఒప్పందం లేకుండా వైదొలిగేందుకు బ్రిటన్ సిద్ధమవుతుందని హెచ్చరించారు.
మాంచెస్టర్లో జరిగిన కన్జర్వేటివ్ పార్టీ వార్షిక సదస్సు ముగింపు సమావేశంలో ఈ వ్యాఖ్యలు చేశారు బోరిస్. ఐర్లాండ్తో బ్రిటన్ సరిహద్దును తెరిచి ఉంచాలనే వివాదాస్పద సమస్యను ఈ ప్రణాళికలు పరిష్కరిస్తాయని చెప్పారు. ఈ ప్రతిపాదనలను ఈయూ నాయకులు అర్థం చేసుకుంటారని ఆకాంక్షించారు.
ఈ రాజీ ఆఫర్పై చర్చించేందుకు యురోపియన్ కమిషన్ అధ్యక్షుడు జీన్ క్లాడ్ జుంకర్తోతో మాట్లాడనున్నారు జాన్సన్.
బ్రెగ్జిట్పై మాజీ ప్రధాని థెరిసా మే మాదిరిగానే పార్లమెంట్లో ఇబ్బందులు ఎదుర్కొంటున్నారు జాన్సన్. అక్టోబర్ 17న ఈయూ శిఖరాగ్ర సదస్సులో ఒప్పందం కుదుర్చుకోకపోతే బ్రెగ్జిట్ను ఆలస్యం చేయాలని కోరుతూ గత నెలలో ఎంపీలు ఒక చట్టాన్ని ఆమోదించారు. ఎంపీల నిర్ణయంతో ఒప్పందం లేకుండా నిష్క్రమిస్తామని ఆయన ఇచ్చిన వాగ్దానం దెబ్బతింది.
బ్రిటన్ పార్లమెంటు మూడు సార్లు తిరస్కరించిన.. బ్రస్సెల్స్తో మే అంగీకరించిన నిష్క్రమణ నిబంధనలపై జాన్సన్ తిరిగి చర్చలు జరుపుతున్నారు. మే ప్రతిపాదించిన వివాదాస్పద ప్రణాళికలకు ప్రత్యామ్నాయాన్ని కనుగొనడంపై ఆయన దృష్టి సారించారు. ఇవి బ్రెగ్జిట్ అనంతరం బ్రిటీష్ ఉత్తర ఐర్లాండ్, ఈయూ సభ్య దేశం ఐర్లాండ్తో సరిహద్దు తెరిచి ఉంచాలని లక్ష్యంగా పెట్టుకున్నాయి.
8 నుంచి పార్లమెంట్ రద్దు..
బ్రిటన్ పార్లమెంట్ను అక్టోబర్ 8 నుంచి 14 వరకు సస్పెండ్ చేయాలని జాన్సన్ కోరినట్లు ప్రధాని కార్యాలయం తెలిపింది. గత పార్లమెంట్ రద్దు ప్రయత్నం చట్టవిరుద్ధమని ఆ దేశ సుప్రీం కోర్టు తీర్పు వెలువరించిన కొన్ని వారాల తర్వాతనే ఈ నిర్ణయం తీసుకోవటం ప్రాధాన్యం సంతరించుకుంది.
ఇదీ చూడండి: అమెరికా తయారీ రంగంపై మాంద్యం మబ్బులు
